A Garda Civil centra o seu labor no control de festas privadas e horario de peches de bares
Tras levantar a Xunta as restricións de peches perimetrais, controlarán que se cumpran as medidas sanitarias.
Por E.P. | SANTIAGO DE COMPOSTELA | 24/12/2020 | Actualizada ás 11:06
A Garda Civil, tras decretar a Xunta o levantamento dos peches perimetrais durante as datas do Nadal, centra os seus esforzos na vixilancia e control das medidas sanitarias.
E é que, desde as 00,00 horas do pasado 23 de decembro ata as 24,00 horas do 25, os cidadáns galegos poden atravesar os perímetros de municipios pechados con motivo de reunirse coas súas familias.
Deste xeito, as Unidades de Seguridade Cidadá da Benemérita centran os seus labores nestas datas no incremento da vixilancia de aforamentos, horarios de peche, reunións e festas privadas, o uso da máscara e o mantemento das distancias interpersoais.
Ademais, os controis de mobilidade seguen vixentes para garantir o cumprimento do toque de queda, que en Noiteboa finalizará ás 1,30 da madrugada.
