A Guardia Nacional Bolivariana detivo aos presuntos asasinos da galega que mataron en Venezuela
A muller foi secuestrada e tras non poder poñerse en contacto cos seus familiares para cobrar o rescate decidiron asasinala.
Por Europa Press / Redacción | SANTIAGO DE COMPOSTELA | 26/12/2020 | Actualizada ás 13:19
Varias persoas foron detidas nos últimos días pola Guardia Nacional Bolivariana como presuntos responsables do secuestro e asasinato en Venezuela de María del Carmen Nogueira, unha sexagenaria que é natural de Silleda.
Segundo publican diversos medios do país latinoamericano, que citan fontes castrenses, a muller foi raptada o pasado 19 de decembro cando circulaba nunha camioneta. A última vez que foi vista atopábase na Avenida Vitoria de Caracas.
A partir dese momento, os seus familiares perdéronlle a pista. Ao parecer, os presuntos secuestradores trataron de contactar cos seus parentes para pedir un rescate pero, ao atoparse estes fose do país, matárona e botaron o seu corpo ao río Guaire.
De acordo ás investigacións iniciais, tal e como recollen medios venezolanos, algúns dos responsables do asasinato foron detidos por mor dun accidente que sufriron despois de lanzar o cadáver ao río.
Desde entón, bombeiros e paramédicos do Ministerio de Transporte buscan na canle o corpo, sen que ata o momento fose posible rescatalo. María del Carmen Nogueira é natural do lugar da Freixeira, na parroquia silledense de Lado, onde viven familiares directos seus, segundo confirman a Europa Press fontes municipais.
