Por X.M. Fernández | Verín | 27/12/2020 | Actualizada ás 23:50
Este luns, 28 de decembro ás 20:00 h., haberá unha reunión entre os axentes culturais da comarca de Verín no Auditorio Municipal co obxectivo de establecer un diálogo sobre os camiños a seguir tras a COVID-19.
A actividade xorde das mans de Farlopa.Fanzine -proxecto de ámbito local que pretende dinamizar a cultura na comarca de Verín- e conta coa colaboración de Akasha Laboratorio Audiovisual e co apoio do Concello de Verín.
Segundo os organizadores, o evento nace para buscar a posta en común das diferentes visións para afrontar a situación derivada do último ano e procurará servir como motor para motivar futuras iniciativas a través da colaboración entre as entidades involucradas. “Mesa Redonda: Covid-19 e cultura en Verín” tamén dará voz aos artistas locais mediante a exhibición de diferentes obras ao longo do evento.
Contará coa presenza de varios axentes culturais da comarca convidados para mostrar os diferentes sectores e puntos de vista da situación actual. O evento será retransmitido en directo para chegar a todos os interesados e as interesadas e poderá ser visualizado a través da canle de You Tube de Farlopa Fanzine e das redes sociais dos participantes grazas á realización de Akasha Laboratorio Audiovisual. Búscase deste xeito dar a posibilidade de participar en todo momento no diálogo tamén dende a casa e unha moderadora online recollerá os comentarios do streaming e compartiraos cos asistentes no auditorio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.