Estudan xa posibles casos da cepa do Reino Unido na Coruña e na Mariña
Xa hai catro casos confirmados en Madrid. A nova cepa británica ten 22 cambios con respecto ao virus orixinal do SARS-Covid 19.
Por Galicia Confidencial | A Coruña | 28/12/2020 | Actualizada ás 17:23
A Consellería de Sanidade está alerta ante a posibilidade de que a cepa británica da Covid estea xa en Galicia. Polo momento hai varios casos en investigación, concretamente, nunha paciente ingresada no CHUAC da Coruña desde o pasado sábado e que procedía deste país da Unión Europea. Tamén doutro paciente da Mariña.
Segundo puido confirmar GC de fontes médicas, estes pacientes están sendo investigados tras ser de "risco" e ter chegado a Galicia procedente do Reino Unido para pasar as festas de Nadal. O seu caso, ao ser de alta prioridade pasou a ser investigado con detemento.
Estas fontes aseguran que o caso está sendo investigado no Departamento de Microbioloxía, pero, polo momento, non poden confirmar que a paciente teña a variante da cepa británica. Pola súa banda, desde o Sergas suliñan en declaracións a este medio que, polo momento, non hai "ningún caso identificado" en Microbioloxía ou Medicina Preventiva da cepa británica, pero "seguen en alerta".
CASOS EN MADRID
Polo momento, o Ministerio de Sanidad confirmou xa catro contaxiados detectados en Madrid e que este domingo presentaron síntomas leves da covid-19. Segundo o ministro Illa, os catro pacientes presentaron un resultado de PCR negativo para viaxar a España, que fixeron antes de que se alertase da nova cepa e da súa maior transmisibilidade, explicou o ministro, que se puxo en contacto coa Comunidade de Madrid para abordar a situación.
NOVAS CEPAS
De todos os virus, incluídos os coronavirus, xorden constantemente novas cepas ou variantes, algo para o que os científicos que desenvolven vacinas xa están preparados. No caso da nova cepa da covid de Reino Unido, a viróloga Wendy Barclay, do Imperial College London, dixo que se identificaron dúas decenas de mutacións no seu código xenético, o cal é inusual.
"Normalmente vemos que os virus se diferencian entre si por un ou dous cambios, pero este ten un total de 22 ao mesmo tempo, e iso ao coñecerse de inmediato xera unha especie de alarma", explicou Barclay na BBC.
"Hai varias desas mutacións que cremos que son moi importantes para axudar ao virus a ingresar ás células moi rapidamente, polo que estamos a tratar de obter evidencias que apoie iso. Pero biolóxicamente, é factible que o virus cambiase a forma en que se comporta debido a esas mutacións", indica Barclay.
