Un informe alerta da "violencia institucional" cara as mulleres e da perpetuación de roles na publicidade

A asociación Maternidades Feministas (MaterFem) presentou este luns o seu Observatorio sobre as violencias cotiás que afectan á maternidade, un informe elaborado a partir de case 300 enquisas a mulleres, e no que se conclúe que as nais e os seus fillos e fillas viven a diario situacións de "violencia" tanto económica, como cultural, ou doutro tipo.

Segundo este informe, unha elevada porcentaxe das mulleres enquisadas afirmaron sentir "violencia institucional" no seu trato con administracións ou en edificios públicos, unha "violencia" que MaterFem identificou con situacións como as dificultades para acceder aos transportes públicos con carriños de bebé, a ausencia de salas de lactación, cambiadores e outros servizos en edificios públicos, ou a incompatibilidade de horarios para poder resolver trámites.

O Observatorio desvelou, por outra banda, que un 55 por cento das mulleres entrevistadas aseguraron que a maternidade prexudicou as súas carreiras profesionais. Así mesmo, tres cuartas partes das enquisadas denuncian a falta de axudas económicas ás nais ou a falta de valoración económica dos coidados; a elas sumir un 48 por cento das mulleres, que aseveran que o permiso de maternidade é insuficiente.

O informe tamén destaca que as nais perciben como "normalizada" a violencia contra as mulleres en ámbitos como videoxogos, publicidade, ou comunicación; e un 74,4 por cento considera que eses medios fan un "tratamento sexista dos temas relacionados coas mulleres".

Así mesmo, o Observatorio tamén fai fincapé no tratamento da maternidade por parte dos servizos sanitarios, e son moitas as enquisadas que reflicten sentir "violencia obstétrica" durante os seus embarazos, partos e postpartos. Ademais, máis do 83 por cento das mulleres denunciaron "falta de apoio psicolóxico", máis do 73 por cento sentiuse "xulgada ou cuestionada" acerca da súa forma de vivir a maternidade e criar aos seus fillos, e case un 79 por cento recoñeceron sufrir unha gran "carga mental" asociada á maternidade.

CONCLUSIÓNS

En definitiva, o Observatorio de MaterFem concluíu que o sistema "castiga" ás mulleres que son nais, porque os permisos son "exiguos", son maioritariamente elas as que piden redución de xornada para dedicarse á crianza, teñen máis risco de perder os seus traballos por ser nais e sofren en maior medidas as dificultades de conciliación. Todo iso nun sistema que perpetúa modelos androcéntricos e "invisibiliza" ás mulleres, mesmo en procesos como a xestación e a crianza.

Mural realizado polas internas da prisión da Lama contra a violencia de xénero.. INSTITUCIÓNS PENAIS - Arquivo