Os empresarios da área de Ferrol piden poder pechar ás 23.00 como na Coruña e non ás 18.00 horas
Din que, co mesmo tramo de incidencia de coronavirus que na Coruña, á hostalaría da cidade herculina permíteselle pechar ás 23,00 horas.
Por Europa Press / Redacción | Ferrol | 29/12/2020 | Actualizada ás 20:56
A Confederación de Empresarios de Ferrol, Eume e Ortegal expresou este martes a súa preocupación polo "pau" que supón para a hostalaría de Ferrol e Narón que "unicamente se lles permita abrir" ata as 18,00 horas, unha hora máis tarde do establecido ata agora.
A entidade, dixeron nun comunicado, confiaba en que os últimos datos de evolución da pandemia "permitisen minorar as restricións" para a hostalaría e que "mesmo puidese tomarse algunha medida relacionada co levantamento do perímetro" que pecha esta área e "que tanto repercute no comercio local.
Así, a Confederación de Empresarios indicou que, co mesmo tramo de incidencia de coronavirus que na Coruña, á hostalaría da cidade herculina permíteselle abrir ata as 23,00 horas.
A Asociación de Hostaleiros de Ferrol e Comarca, incluída en COFER, mantivo conversacións co alcalde, Ángel Mato, e coa responsable de Turismo da Xunta, Nava Castro, para ver a posibilidade de que "se reconsidere o horario, tendo en conta que o sector hostaleiro é un dos máis castigados polas consecuencias económicas da pandemia", indican.
