Por Europa Press / Redacción | Santiago de Compostela | 02/01/2021 | Actualizada ás 13:38
A curtametraxe documental 'Solo son peces', que codirixe a galega Paula Iglesias xunto á vasca Ana Serna, é candidata aos Premios Goya na súa 35 edición, que se celebrará en marzo de 2021.
'Solo son peces' conta a historia de Teslem, Dehba e Jadija, que traballan nunha piscifactoría nos campamentos de poboación refuxiada saharauí. Fano en Tindouf, en Alxeria, en pleno deserto e moi lonxe da súa terra.
"Criar peixes no deserto é resistir altas temperaturas e constantes treboadas de area, é adaptarse a un novo medio, moi diferente ao de orixe", destaca a sinopse da cinta.
Rodada en abril de 2019 e producida en outubro dese ano,compite con outras nove curtas documentais nas votacións da Academia para determinar cales son os nomeados.
Esta fase conclúe o 8 de xaneiro e a actriz e cantante Ana Belén e o actor e monologuista Dani Rovira desvelarán o 11 de xaneiro os nomeados.
A súa estrea produciuse no Festival Internacional de Cinema Documental e Curtametraxe de Bilbao en novembro de 2019 e o internacional no Festival International De Documentaires Audiovisuels Biarritz en xaneiro de 2020.
Tras unha boa acollida por diferentes citas, polo momento obtivo o Gran Premio Cinema Español en Bilbao e tamén un Vision Award no Innsbruck Nature Filme Festival de Austria.
Paula Iglesias (Santiago de Compostela, 1986) estudou Xornalismo e Edición e posproducción. Ana Serna (Bilbao, 1988) é licenciada en Comunicación audiovisual e Máster de Investigación e creación en arte.
Ambas as dúas impulsaron xunto a outras mulleres en 2012 a produtora cultural Histeria Kolektiboa e en 2015 formaron AlBorde Films, produtora independente na que codirixen documentais sobre historias "que contribúen a construír identidades".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.