Por E.P. | SANTIAGO DE COMPOSTELA | 07/01/2021 | Actualizada ás 14:07
O condutor, e único ocupante, dun turismo necesitou a axuda dos Bombeiros de Santa Comba para abandonar o seu vehículo despois de sufrir unha saída de vía na estrada de San Cristovo e caer ao río Tapia cando circulaba á altura da localidade de Grixoa, no termo municipal coruñés de Santa Comba.
Os equipos de intervención no sinistro sinalaron ao 112 que tras o accidente, o vehículo foi arrastrado pola forza da auga estando parcialmente mergullado. De feito, testemuñas do suceso afirmaron que o condutor estaba liberado, pero, non era quen de abandonar o vehículo por culpa da intensidade da corrente fluvial nese momento. Segundo informa o 112 Galicia, houbo que empregar cordas para rescatar ao home, tras o que foi evacuado en ambulancia ata un centro hospitalario.
Os feitos ocorreron sobre as 10,30 horas na parroquia de Mallón. Un particular chamou ao 112 para dar aviso do sucedido. Tras finalizar o operativo de rescate, os servizos de emerxencia trataron de restablecer as condicións de seguridade no punto e xestionar a retirada do vehículo precipitado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.