Un autobús urbano da Coruña choca contra un posto de probas PCR

Un autobús urbano da Coruña chocou este martes contra o Autocovid do Ventorrillo sen que afectase á actividade e ás probas PCR previstas no mesmo, segundo confirmou un portavoz da área sanitaria coruñesa.

Mentres, desde a Compañía de Tranvías, indicaron que o accidente se produciu sobre as 07,20 horas cando un autobús da liña 7 chocou co posto Covid, cando non estaba aberto.

"Por se había algún problema", precisaron fontes sanitarias sobre a instalación, decidiuse trasladar as probas previstas e todos os equipos ao centro de saúde próximo. "Non se suspendeu nada", indicaron as mesmas fontes, que sinalaron que esperan que o venres poida retomarse no Autocovid a actividade, unha vez arranxadas as zonas afectadas.

Pola súa banda, desde a Compañía de Tranvías confirmaron que se abriu unha investigación "para pescudar as causas do incidente". "Non houbo feridos, só danos no tellado e no bus", engadiron.