Por E.P. | Santiago de Compostela | 08/01/2021 | Actualizada ás 14:42
O deputado do BNG no Congreso, Néstor Rego, critica que o proxecto de lei estatal de loita contra a fraude fiscal invade competencias galegas, "vulnera a autonomía fiscal" de Galicia e penaliza as herdanzas en vida.
O BNG presentou emendas no Congreso para eliminar do texto as reformas que afectan á lei do IRPF e do imposto de sucesións en relación coas herdanzas en vida.
Neste sentido, o deputado Néstor Rego censura que con esta reforma o Ministerio de Facenda "penaliza" a cidadáns galegos, ademais de vulnerar o Dereito Civil de Galicia.
"En primeiro lugar, o Estado non pode regular indirectamente unha figura propia do dereito civil de Galicia, facendo que na práctica dificulte ou impida que se acuda aos pactos sucesorios", apunta o BNG.
"E ademais, a regulación que pretenden supón un tratamento discriminatorio desde o punto de vista fiscal para aqueles herdeiros ou herdeiras que reciban bens en vida fronte a aqueles que o fan tras a morte dun familiar, cando se trata nos dous casos de adquisicións 'mortis causa", prosegue.
Rego explica que "neste último caso, se a persoa que herda recibe os bens tras a morte do familiar e a continuación procede á súa venda, só debería tributar pola plusvalía desde o momento da recepción dos bens e ata a efectiva transmisión", en cambio, de aprobarse a reforma, se se trata dunha herdanza en vida, e véndense os bens antes da morte do causante, deberá tributar polo incremento patrimonial desde que o testador adquirira o ben.
"Resulta de xeito evidente inxusto considerar que realizar un acto lexítimo segundo o Dereito Civil Galego e respectando as normas tributarias propias da Administración galega, sexa unha práctica de evasión fiscal", deixa claro Rego.
O deputado nacionalista advertiu que de manterse o texto actual, suporá un grave prexuízo para moitos galegas que se acolleron a esta modalidade hereditaria e que, ante a situación de crise, poden verse na necesidade de vender os bens.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.