As persoas sen fogar disporán de 300 prazas en albergues durante a onda de frío, sinala a Xunta
O Concello de Ferrol tamén informa da activación dun plan especial durante a madrugada do sábado para localizar a persoas que dormen na rúa.
Por Europa Press / Redacción | SANTIAGO DE COMPOSTELA | 09/01/2021 | Actualizada ás 14:41
A Xunta lembrou que existen máis de 300 prazas na rede de albergues da Comunidade galega para acoller a persoas sen fogar ante a onda de frío que afecta nas últimas xornadas á Península Ibérica. Nun comunicado emitido este sábado, o Goberno autonómico sinala que a maior parte destes centros contan con servizos de "restauración, aloxamento e orientación profesional, así como de aseo persoal, lavandaría e atención e acompañamento social".
Así mesmo, o Concello de Ferrol tamén informa da activación dun plan especial durante a madrugada do sábado para localizar a persoas que dormen na rúa. En total foron atendidas cinco persoas, das cales, unha foi trasladada a unha pensión, outra a casa dun familiar e outro tres "rexeitaron o aloxamento". No despregamento, que continuará na noite do domingo, participaron 12 efectivos da agrupación de voluntarios de Protección Civil.
