O PSdeG acusa á Xunta de evitar a participación pública na futura lei de recuperación de terras agrícolas
Os socialistas aseguran que con esta "manobra" o Goberno galego quere sacar adiante o texto "evitando ter que afrontar os informes preceptivos da asesoría xurídica".
Por E.P. | SANTIAGO DE COMPOSTELA | 11/01/2021 | Actualizada ás 16:45
O portavoz de Agricultura do PSdeG no Parlamento de Galicia, Martín Seco, denunciou a "artimaña" do Goberno galego para "sortear" os informes xurídicos e a participación pública dos afectados pola futura lei de recuperación de terras agrícolas.
Así o denunciou nun comunicado remitido aos medios despois de que o PP presentase este luns a norma, que será presentada na Cámara polo Grupo Parlamentario Popular como proposición de lei e non polo Goberno galego
Segundo denunciou Martín Seco esta "manobra" permite ao Goberno galego sacar adiante o texto "evitando ter que afrontar os informes preceptivos da asesoría xurídica, do Consello Económico e Social (CES), do Consello Agrario Galego e do Consello Forestal de Galicia, ademais do período de exposición pública para consultas dos sectores afectados".
Ante iso, o parlamentario do PSdeG esixe ao Goberno galego que asuma de novo o trámite desta iniciativa lexislativa para "ter todas as garantías legais e o maior consenso posible entre os sectores afectados".
