Por Europa Press / Redacción | SANTIAGO DE COMPOSTELA | 13/01/2021 | Actualizada ás 18:17
A portavoz nacional do BNG, Ana Pontón, pediu ao presidente da Xunta, Alberto Núñez Feijóo, que sexa "claro e contundente" na adopción de medidas e que o mesmo Diario Oficial de Galicia (DOG) que recolle as restricións para frear os contaxios da covid inclúa tamén axudas directas aos sectores máis afectados.
"A situación non é culpa dunha cidadanía que maioritariamente está a cumprir coas normas e, por iso, o intento de Feijóo de responsabilizala é indigno, máxime vindo de alguén que se fixou como obxectivo salvar o Nadal", manifestou Pontón na xornada na que o presidente anunciou o incremento das restricións, unhas medidas que inclúen o peche da hostalaría ás 18,00 horas en toda Galicia.
Pontón criticou que agora Feijóo se "despache" pedindo á xente que "non traslade os bares aos seus domicilios". "Realmente pensa que esta é a preocupación dos galegos e as galegas no medio da pandemia?", preguntou. A líder do Bloque instou ao presidente da Xunta a "deixar de rifar á xente" e "asumir as súas responsabilidades". "O resto é incompetencia na toma de decisións e covardía á hora de asumilas", subliñou.
OUTRAS CRÍTICAS ÁS DECLARACIÓNS DE FEIJÓO
Por outra banda, noutro comunicado remitido aos medios, a Asociación Galega para a Defensa da Sanidade Pública censurou que o máximo mandatario autonómico pretenda "culpar" do empeoramento da pandemia á poboación que celebrou o Nadal cando "el mesmo autorizou as reunións de dez persoas e permitiu a mobilidade".
A asociación denunciou que a Xunta recortou o persoal da Atención Primaria, reduciu o seu orzamento e suprimiu "centos de camas nos hospitais públicos". "Pechou centros de saúde, eliminou consultas de pediatría mantivo os servizos da saúde pública na práctica indigencia", criticou a entidade, que acusa tamén á Xunta de "deixar morrer" a "centos de maiores nas residencias".
"Para disimular a súa responsabilidade pretende agora incrementar as restricións pero non fala do esforzo a realizar para vacinar a poboación, que ao ritmo actual pode tardar anos", sinala. Por todo iso, consideran as declaciones do presidente "inaceptables" e "ofensivas" para a poboación. "Esiximos unha rectificación e o inicio dun proceso de reconstrución do sistema sanitario público", reclama.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.