Máis de trinta familias desaloxadas na Coruña por risco estrutural de dous edificios en obras
A empresa encargada das obras busca hoteis para proceder ao desaloxo. Dende o consistorio explican que se descarta "risco inminente de esborralle dos edificios".
Por Europa Press / Redacción | A CORUÑA | 14/01/2021 | Actualizada ás 13:00
O risco estrutural debido a unhas obras a cargo da empresa Desarrolla na rúa Rey Abdullah obrigou a proceder ao desaloxo dos residentes de dous edificios da avenida de Finisterre, segundo informaron desde o consistorio.
Os bombeiros e a Policía Local deron o aviso por risco estrutural de dous edificios, un suceso do que se tivo coñecemento, segundo fontes municipais consultadas por Europa Press, "aproximadamente ás 9,30 horas".
Ante o risco estrutural, expúxose o desaloxo de dous edificios completos na avenida de Finisterre, con máis de 30 familias. "A empresa está a buscar agora hoteis e empezou as xestións cos presidentes das comunidades para desaloxar", explicaron desde o consistorio, que descartaron que haxa "un risco inminente de esborralle dos edificios".
"Pero para asegurar mellor reacóllense", apostilaron. Tamén precisaron que hoxe mesmo "se empezará a encher con terra ese descalzamento", ademais de proceder a apontoar a zona afectada, precisaron outras fontes.
Desde o consistorio, estímase que tardarán "tres semanas en poder aseguralo". "Pero a situación da obra e os realoxos está controlada", insisten.
