As autoridades sanitarias recoñecen que a positividade en Galicia está por encima do que admite a OMS

As autoridades sanitarias constataron este martes que en Galicia hai "transmisión comunitaria" e lanzaron unha mensaxe á poboación para que "extreme a prudencia" dada a "gravidade" da situación: hai que ter "máis preocupación que nunca", cumprir as normas, moverse "só para o imprescindible", respectar as distancias e tentar que as reunións se limiten a persoas coas que se convive.

Así o trasladaron o conselleiro de Sanidade, Julio García Comesaña; así como a directora xeral de Saúde Pública, Carmen Durán; o xerente do Sergas, Julio Flores; e o secretario xeral técnico do departamento sanitario autonómico, Alberto Fontes, quen informaron en rolda de prensa sobre as medidas acordadas na pasada xornada na reunión do comité clínico que asesora á Xunta.

O conselleiro incidiu na mensaxe de precaución tras constatar que, aínda que Galicia continúa "mellor" que o conxunto estatal, rexistra unha situación "mala". Os datos da evolución epidemiolóxica que o testemuñan detallounos a responsable de Saúde Pública, quen subliñou que a taxa de positividade na Comunidade está no 10%, "no límite" do que considera admisible a Organización Mundial da Saúde (OMS).

Así mesmo, precisou que a incidencia acumulada na Comunidade é, a 14 días, de 485 casos por cada 100.000 habitantes, e a sete días, de 297,6. Do mesmo xeito que o conselleiro, Durán alertou do "importante crecemento" no que respecta ao número de casos de covid-19 detectado na Comunidade. Tamén incidiu en que "preocupa" que o número reprodutivo básico está en 1,4, o que evidencia que o momento é "de ascenso".

Na comparativa co conxunto de España, aínda que a situación galega "preocupa", a responsable de Saúde Pública incidiu en que aínda é significativamente mellor tanto no que respecta á taxa de positividade como á incidencia acumulada.

Iso si, as autoridades sanitarias galegas, coa responsable de Saúde Pública á fronte, remarcaron que en Galicia "non se pode falar aínda dun aplanamento da curva". Os "raios de luz" que podería supor o feito de levar datos similares no último par de días non se poden traducir aínda en estabilización. Ademais, Durán incidiu na dificultade que leva realizar unha análise certeira tras unha fin de semana.

O conselleiro incidiu en que se respecten as normas, se reduza ao máximo a mobilidade e se utilice correctamente a máscara; pero tamén reforzou este chamamento á responsabilidade o doutor Tato Vázquez Lima, coordinador de Urxencias no Hospital do Salnés.

Vázquez Lima enviou unha mensaxe moi contundente e proclamou que ou se "para" esta terceira onda ou será peor que a primeira. Por iso, advertiu que ou os cidadáns son "cómplices" dos sanitarios e actúan con responsabilidade ou isto vai "ir por mal camiño" e non haberá "saída". "Todos sabemos cales son as normas. Manteñamos as distancias e extrememos a prudencia. Salgamos xuntos", apelou.

Rolda de prensa de autoridades sanitarias galegas tras o comité clínico.. Xunta de Galicia | Fonte: Europa Press