A Xunta sinala que as axudas do plan de rescate irán a todos os solicitantes que cumpran cos requisitos
O goberno autonómico está a ultimar os pagos ao amparo desta convocatoria para paliar as consecuencias das medidas sanitarias, segundo a conselleira de Emprego e Igualdade.
Por E.P. | SANTIAGO DE COMPOSTELA | 20/01/2021 | Actualizada ás 20:39
O Goberno galego asegurou este mércores que todos os solicitantes que cumpran os requisitos beneficiaranse das axudas incluídas no 'plan de rescate' destinado a autónomos, microempresas e establecementos de hostalaría.
Así o trasladou a conselleira de Emprego e Igualdade, María Jesús Lorenzana, durante a Mesa do Emprego Autónomo de Galicia, na que explicou que a Xunta está a ultimar os pagos ao amparo desta convocatoria para paliar as consecuencias das medidas sanitarias.
Deste xeito, prevese que en xaneiro finalicen os pagos e que en febreiro estea preparado o segundo plan de rescate, que incluirá de novo axudas directas aos sectores afectados polas novas restricións e "para apoiar a solvencia" das empresas galegas.
Para iso, segundo asegura nun comunicado, a Xunta mantén un "contacto fluído" cos interlocutores sectoriais para perfilar os apoios, con atención "especial" á hostalaría.
