Poderase rematar coa caza algún día en Galicia?
Iso é o que piden organizacións ecoloxistas que acusan á Xunta de manter esta práctica sen dispor dos estudos científicos adecuados.
Por Galicia Confidencial | Compostela | 22/01/2021 | Actualizada ás 22:20
Ecoloxistas en Acción e Petón do Lobo piden o fin da caza e alertan que a Dirección Xeral de Patrimonio Natural da Consellería de Medio Ambiente, Territorio e Vivenda da Xunta de Galicia non acredita a existencia de informes actuáis e obxectivos que avalen as especies que poden ser cazadas. Por iso, cren que mentras non existan argumentos científicos que corroboren o estado das poboacións de animais en Galicia "non se debe volver a cargar unha escopeta contra os animais".
Nun comunicado, estas entidades denuncian que a Dirección Xeral de Patrimonio Natural da Xunta de Galicia carece dos estudos científicos que avalen o exercicio da actividade cinexética como tal. "Ademais de non existir censos actuais das especies cinexéticas non se realizan os estudos de impacto ambiental que require a actual lexislación ambiental para os Plans de ordenación cinexética dos Tecor e dos Plans anuais de aproveitamento cinexético", apuntan.
Por outra banda, din que tampouco se avalían as repercusións da actividade cinexética na área de influencia e na entorna da Rede Natura 2000, tal e como prescribe a normativa ambiental europea. "O mesmo ocorre coas competicións da Federación galega de caza, que se realizan sen control ambiental algún por parte da Dirección Xeral de Patrimonio Natural", afirman.
Para os ecoloxistas, a caza actual contribúe á perda de biodiversidade de especies a un ritmo moi importante que "fai dano á saude do propio ser humano". Neste sentido, denuncian que os xabarís están a ser vítimas, ao abrigo nos últimos anos, dunha "campaña criminalizadora que os culpa de todos os males habidos e por haber" e critican que non existe un método de control efectivo das poboacións de porco bravo".
De feito, van máis alá e apuntan que os estudos evidencian que os xabarís desempeñan unha importante labor nos ecosistemas. "Os ungulados silvestres teñen unha boa capacidade escavadora, removen e osixenan a terra.... e desempeñan unha importante labor carroñeira", conclúen.
