Galicia reclama unidade no Estado para evitar recortes de pesca nas augas compartidas con Reino Unido
A Xunta bota en falla no programa de traballo da presidencia portuguesa do Consello da UE un maior protagonismo de aspectos sociais e económicos do sector marítimo-pesqueiro.
Por Europa Press / Redacción | Santiago de Compostela | 25/01/2021 | Actualizada ás 14:47
Galicia reclamou unidade de acción entre as comunidades autónomas e o Goberno central para presentar argumentos socioeconómicos eficaces que permitan defender os intereses da frota na negociación para a pesca en augas compartidas co Reino Unido, co fin de evitar posibles recortes de cotas.
A conselleira do Mar, Rosa Quintana, participou por videoconferencia no Consello de Ministros de Pesca da Unión Europea, como representante das comunidades autónomas, xunto co ministro de Agricultura, Pesca e Alimentación, Luís Planas.
Quintana apelou a maximizar as posibilidades deste sector para compensar outras caídas e lembrou que o Executivo comunitario cedeu a Reino Unido o 25 por cento das posibilidades de pesca europeas a cambio do acceso a augas británicas durante cinco anos e medio.
Ademais, considera necesario ter en conta a necesidade de dispor de cota de especies para a súa cesión e intercambio con outros Estados membros, e buscar o equilibrio entre aspectos ambientais, económicos e sociais.
Neste sentido, Quintana considera "clave" mellorar as propostas do Consello Internacional para a Exploración do Mar para especies como a pescada do norte, o rapante ou o rape, para así evitar recortes ou para lograr ampliar as subas nas cifras presentadas para outras como o lagostino ou o alfonsino.
PROPOSTAS
Tanto para a pescada do norte como para o rapante, Galicia defende manter ou aumentar o Total Admisible de Captura (TAC) tendo en conta os datos de mellora da biomasa.
Para o rape, reclama un incremento superior ao aconsellado polo ICES, tanto polo comportamento da biomasa como polo mantemento outros anos do Rendemento Máximo Sustentable. Doutra banda, en relación a especies de augas profundas, a Xunta defende eliminar os TAC.
En relación ao programa de traballo da presidencia portuguesa do Consello da UE, a Xunta bota en falta un maior protagonismo de aspectos sociais e económicos do sector marítimo-pesqueiro neste contexto de pandemia e do impacto do Brexit.
