Portugal sopesa enviar pacientes covid a outros países ante o "colapso" do seu sistema hospitalario

Portugal está a ponderar pedir axuda internacional para poder enviar pacientes covid a hospitais doutros países. A medida, anunciada pola ministra de saúde nunha entrevista televisiva, xorde en resposta á saturación que sofren os centros hospitalarios lusos, situado xa ao bordo do colapso logo de semanas sufrindo un crecemento constante de hospitalizados.

"O Goberno portugués está a accionar todos os mecanismos dos que dispón para garantir que dá a mellor asistencia", explicaba a Ministra, anunciando tamén que estes mecanismo se situaban, "principalmente" no eido internacional. Neste aspecto, a ministra do socialista Costa falou claramente de "pedir axuda internacional" para "enviar pacientes a outros países".

Portugal rexistra, nestes momentos, máis de 6.420 pacientes de covid ingresados, dos cales 767 se atopan en UCI. O anuncio do Goberno de Costa pon no punto de mira os hospitais españois e galegos. Precisamente, os centros hospitalarios da comunidade están ao bordo de marcar un novo récord de ingresos en UCI logo de rexistrar 9 entradas novas que elevan a 170 o número total de pacientes criticos.