Outra borrasca, 'Justine', traerá fortes refachos de vento e intensas choivas en Galicia
Aínda que a borrasca entrará o xoves, Meteogalicia estima que "os efectos máis importantes" produciranse venres e sábado.
Por Europa Press / Redacción | Compostela | 27/01/2021 | Actualizada ás 12:33
A borrasca Justine, convertida en cicloxénese explosiva, entrará en Galicia a última hora do próximo xoves, aínda que os efectos máis importantes produciranse, segundo indicou Meteogalicia a Europa Press, o venres e "probablemente" o sábado.
Serás unhas xornadas nas que se esperan intensas choivas e fortes refachos de vento. Os primeiros efectos da formación de Justine deixaranse sentir xa este mércores na zona da Mariña, en Lugo, en alerta amarela a partir das 18,00 horas por refachos de ventos superiores aos 80 km/h.
Un aviso que se manterá para o xoves na comarca lucense, e que se ampliará, a partir das 09,00 h por ventos do suroeste de forza 7 na Costa da Morte e a costa noroeste da Coruña. Con todo, segundo indicou o meteorólogo Juan Taboada en declaracións a Europa Press, o groso da borrasca tocará Galicia o venres e durante as primeiras horas do sábado.
"Aínda que se trata dunha borrasca relativamente pequena, denomínase explosiva pola rapidez coa que se moverá, o que dificulta prognosticar, tanto a súa traxectoria exacta, como os seus efectos", explicou Taboada.
"A alerta mantense amarela, de momento, pero é posible que, nos próximos días con previsións máis precisas, cambie a laranxa", indicou Meteogalicia que, ademais dos fortes ventos e choivas que prevén para o venres, estiman "un probable temporal de ondas"para o sábado, ao abandonar a cicloxénese explosiva a comunidade.
De momento, a Axencia Estatal de Meteoroloxía (Aemet), mantén para o venres a alerta amarela en toda Galicia por fortes ventos, con refachos de ata 80 km/h, e na provincia da Coruña. A iso súmase un aviso da mesma intensidade no mar, con ventos do sur ou suroeste de forza 7.
