O alcalde de Santiago ve "un raio de luz" tras días de "certa consolidación" nos casos activos
Bugallo confía en que os datos dean lugar a unha "situación de meseta" que desemboque no "camiño de baixada".
Por E.P. | SANTIAGO DE COMPOSTELA | 29/01/2021 | Actualizada ás 13:14
O alcalde de Santiago, Xosé Sánchez Bugallo, asegurou este venres que os datos de casos activos de covid-19 dos "últimos cinco días" permiten albiscar "un raio de luz" e observar unha "certa consolidación". Nunha rolda de prensa, o rexedor recoñeceu que a evolución da covid-19 na cidade é "o tema que máis preocupa" ao consistorio, sobre todo no relativo á ocupación da UCI e aos 737 casos activos desta enfermidade.
No entanto, explicou que, nos últimos días, a cifra de casos activos fluctuou entre os 731 e os 746, a modo de "dentes de serra", o que permite observar "certa consolidación" e é "un pequeno dato optimista". Así, Sánchez Bugallo indicou que, aínda que nas últimas semanas os casos foron crecendo a un ritmo de entre o catro e o oito por cento, neste últimos cinco días a variación é do 2% e, ademais, con subidas e baixadas.
Aínda que a "cifra é enorme", o alcalde confiou en que estes datos dean lugar a unha "situación de meseta" que desemboque no "camiño de baixada". No entanto, admitiu que "é posible que a incidencia hospitalaria siga subindo nos próximos días", polo que instou a todos a "ser extraordinariamente prudentes".
