Por E.P. | A CORUÑA | 29/01/2021 | Actualizada ás 19:20
O pleno da Deputación da Coruña aprobou distintas mocións presentadas por PSOE, BNG e Marea Atlántica nas que se urxe á Xunta e ao Goberno central "a actuar fronte ao desmantelamento industrial da provincia e, en concreto, das comarcas de Ferrolterra, Eume e Ortegal".
"Ante a dramática situación pola que está a atravesar a industria", a Deputación demanda ás administracións autonómica e estatal "a creación urxente dunha mesa de traballo para a reindustrialización e reactivación económica deste tres comarcas afectadas", a través dunha moción impulsada polo PSdeG-PSOE que contou co apoio de PP, Marea Atlántica, Alternativa dos Veciños e a abstención do BNG, que entende que é necesario "actuar xa".
A moción de Marea Atlántica, que incorpora unha emenda do PSOE e foi apoiada por unanimidade de todos os grupos políticos, refírese ao ámbito provincial e demanda a elaboración dun plan de reactivación económica.
A iniciativa do BNG, aprobada por unanimidade, insta tamén a presentar un plan de desenvolvemento económico para o tres comarcas co fin de garantir o traballo para as próximas xeracións.
Por outra banda, o ente provincial demanda "toda a implicación" de Goberno e Xunta para garantir o futuro de Endesa-As Pontes" e insta á compañía a "garantir os postos de traballo dos traballadores do persoal principal, empresas auxiliar e transportistas".
Noutra orde de cousas, o pleno da Deputación da Coruña aprobou, co voto favorable de PSOE, BNG, PP e Alternativa dos Veciños e a abstención de Marea Altlántica, o cambio de nome do instituto Calvo Sotelo da Coruña, que pasará a denominarse IES Rosalía Mera, en homenaxe á empresaria e filántropa coruñesa, falecida en 2013.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.