Por E.P. | SANTIAGO DE COMPOSTELA | 29/01/2021 | Actualizada ás 20:33
O deputado BNG na Cámara baixa, Néstor Rego, denunciou no Congreso o procedemento de contratación do servizo de mantemento de Navantia na ría de Ferrol. Sinala que os pregos elaborados pola empresa pública para a contratación deste servizo conteñen unha división do mesmo en oito lotes e ao mesmo tempo limitan a un máximo de dous os lotes por adxudicatario, o que suporá a fragmentación obrigada na prestación do servizo.
Por iso, insta o Goberno central a paralizar o procedemento de contratación e á elaboración duns novos pregos que promovan a prestación do servizo por un único adxudicatario. E é que advirte que vai provocar a división do cadro de persoal que prestaba este servizo desde o ano 2016. "A ninguén relacionado co sector na comarca de Ferrol escápaselle que este é precisamente un dos obxectivos que a dirección de Navantia persegue con estas medidas, coa intención de debilitar a capacidade de resposta dun cadro de persoal que se ten significado na defensa dos seus dereitos colectivos", explica Rego.
Esta división responde a unha interpretación "perversa" da Lei de Contratos do Sector Público que, aínda que permite a división, establece que non se aplique cando a realización independente das prestacións dificulte a correcta execución do contrato do punto de vista técnico, ou que o risco para esa correcta execución proveña da necesidade de coordinar as diferentes prestacións realizadas por unha pluralidade de contratistas.
"Resulta evidente que a prestación do servizo de mantemento, básico para a produción, por distintos contratistas vai causar discrepancias, descoordinación e atrasos. Non hai causas técnicas nin xurídicas que avalen esta división, só pode apreciarse un intento de penalizar ao cadro de persoal e por en risco a súa continuidade", sinala o Bloque. "Tamén avala esta tese que o centro de Navantia Ría de Ferrol sexa o único que licita o contrato por lotes, mentres que o resto seguen mantendo a unidade no servizo", expón.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.