CCOO ve necesario colocar nos grupos preferentes de vacinación a persoal de axuda no fogar
O sindicato remarca que o persoal de axuda no fogar "está en primeira liña contra a pandemia" e engade que as persoas que atenden están "en moitos casos, xa contaxiadas ou comparten domicilio con persoas contaxiadas do coronavirus".
Por E.P. | A CORUÑA | 01/02/2021 | Actualizada ás 19:13
A Federación de Construción e Servizos de CCOO reclamou a incorporación do persoal de axuda no fogar e aos vixiantes de seguridade dos hospitais nos grupos preferentes de vacinación.
Nun comunicado, explica que solicitou unha reunión co delegado do Goberno en Galicia, Javier Losada, "polos cambios no calendario de vacinación da Covid-19 aprobados polo Consello Interterritorial de Sanidade".
O secretario xeral da Federación, Sergio López, non ve "equitativo" que as persoas dependentes do grao III e os seus coidadores e coidadoras "están no cuarto grupo de vacinación, mentres que as persoas dependentes institucionalizadas están no primeiro".
O sindicato remarca que o persoal de axuda no fogar "está en primeira liña contra a pandemia" e engade que as persoas que atenden están "en moitos casos, xa contaxiadas ou comparten domicilio con persoas contaxiadas do coronavirus" polo que demanda a aplicación do mesmo criterio de vacinación.
López lamenta tamén que "tampouco se teña en conta a vixiantes de seguridade das instalacións hospitalarias a pesar de que poidan estar en contacto directo con pacientes de Covid-19 ou fagan roldas por plantas Covid". "Moitos deles están considerados xa contactos directos por ter que reducir pacientes que quixeron abandonar as instalacións hospitalarias sen a preceptiva autorización", apostila.
