Os furtivos seguen operando a pesar da covid
Case 700 quilos de peixe e máis de 460 útiles requisados, a maioría na Ría de Pontevedra.
Por Europa Press / Redacción | SANTIAGO DE COMPOSTELA | 02/02/2021 | Actualizada ás 20:15
Efectivos do servizo de Gardacostas de Galicia requisaron preto de 700 quilos de diferentes especies de peixe e marisco, xunto a mais de 460 útiles e 350 metros de artes de enmalle, a maioría na Ría de Pontevedra, co comiso de máis de 270 útiles, 350 metros de artes de enmalle retirados e preto de 132 quilos de produtos do mar.
Dos diferentes controis realizados nos últimos días, o operativo máis importante nestas augas permitiu a incautación de 254 nasas a dúas embarcacións por incumprir o horario autorizado, xunto a outras 16 retiradas do mar e que estaban sen identificar. Por mor desta acción, levantáronse actas de presunta infracción e devolvéronse 32 quilos de camarón á auga.
Outro dispositivo no litoral pontevedrés permitiu o comiso de 50 quilos de diferentes especies (centolla, choco, lumbrigante) de tamaño interior ao permitido, e levantáronse as correspondentes actas de presunta sanción aos profesionais identificados.
Finalmente, un terceiro control realizado entre Sanxenxo, Beluso e Aguete saldouse co levantamento de cinco actas de presunta infracción por distintos incumprimentos da normativa, ademais da incautación de tres útiles, 350 metros de artes de enmalle e 30 quilos de centolla.
OUTROS OPERATIVOS
Doutra banda, un control a unha furgoneta na zona de Carlinas, en Ribeira, permitiu requisar máis de 180 quilos de peixe que non chegaba ao talle mínimo, xunto a outros 220 de pota, outros 37,2 de pescada, 17,5 de cabra, 10,3 peixe espada e 7,2 e lirio que carecían de documentación que avalase a rastrexabilidade do produto. Por todo iso, levantouse acta de presunta infracción ao propietario do vehículo e entregouse o peixe a un centro benéfico.
Na ría de Vigo, pola súa banda, desenvolvéronse dous operativos: un na enseada de Cangas con 132 nasas e tres quilos de polbo incautados, e outro na praia de Patos con 50 nasas retiradas e dous quilos de cefalópodo.
Finalmente, un operativo na ría de Ares e A Coruña permitiu requisar seis salabardos e un viveiro, así como 72 quilos de centolla, cinco de nécora, debido a que gran parte dela era de talle inferior.
