31 detidos en Galicia na primeira semana de nivel máximo de restricións pola pandemia
1.874 persoas foron sancionadas nos últimos sete días.
Por Europa Press / Redacción | Santiago de Compostela | 04/02/2021 | Actualizada ás 16:01
A Garda Civil e a Policía Nacional detiveron 31 persoas e tramitaron denuncias a 1.874 durante a primeira semana de nivel máximo de restricións en Galicia para frear a pandemia pola Covid-19. Segundo informou a Delegación do Goberno en Galicia, desde o 27 de xaneiro ata o día 3 de febreiro as Forzas e Corpos de Seguridade do Estado desenvolveron en Galicia 4.766 dispositivos de seguridade, que alcanzaron a 74.768 persoas e 54.434 vehículos.
Na primeira semana tras o ascenso das restricións a nivel máximo, as forzas de seguridade elevaron, en total, 1.874 propostas de sanción e detiveron a 31 persoas.
No que respecta ás últimas 24 horas, a Policía Nacional e a Garda Civil levaron a cabo 733 controis sanitarios. En total, 10.129 persoas foron identificadas, 7.698 vehículos controlados e 256 persoas sancionadas.
A Garda Civil efectuou en Galicia este mércores pasado 655 controis nos que identificaron a 8.872 persoas, inspeccionaron 6.852 vehículos e interpuxeron 167 propostas de sanción.
Mentres, a Policía Nacional levou a cabo durante a pasada xornada 78 dispositivos de vixilancia nos que participaron 257 axentes. Nestes operativos procedeuse á identificación de 1.257 persoas e ao control de 846 vehículos. En total, este corpo expuxo 89 propostas de sanción.
