Feijóo cuestiona a Bárcenas, pero acepta "o que diga a Xustiza e as responsabilidades que haxa que asumir" no PP

O presidente da Xunta de Galicia e líder do PP galego, Alberto Núñez Feijóo, insistiu este venres en atribuír as acusacións de Luís Bárcenas á súa "estratexia exculpatoria" e cuestionou a "verosimilitude" das manifestacións do extesoureiro do PP, aínda que precisou que acepta "o que diga a Xustiza e as responsabilidades que haxa que asumir".

A preguntas dos medios sobre o escrito remitido por Bárcenas a Fiscalía (no que, entre outras acusacións, sinala a Mariano Rajoy como responsable de destruír documentación sobre a 'caixa B' do partido), Núñez Feijóo remitiuse ás súas declaracións das últimas horas, cando proclamou que segue "convencido" da "honorabilidade" do expresidente do Goberno.

A ese respecto, sinalou que "hai unha persoa condenada en firme por unha serie de actitudes delituosas, e hai unha estratexia de defensa baseada na autoexculpación", e pediu, "desde a tranquilidade", agardar a ver "como se desenvolve este sumario, que leva máis dunha década aberto".

No entanto, Feijóo afirmou que acepta "o que diga a Xustiza e as responsabilidades que haxa que asumir", aínda que insistiu en que "facer comentarios da estratexia de defensa exculpatoria dunha persoa que está ante a Xustiza e xa ten condenas previamente non forma parte do debate político".

O mandatario galego cuestionou as manifestacións de Bárcenas no escrito entregado á Fiscalía e reiterou: "Non creo que teña moita verosimilitude o testemuño dunha persoa que usa unha estratexia de defensa, aínda que sexa lexítima".