Manifestación dos hostaleiros de Ferrol contra as restricións mentres demandan un rescate

Hostaleiros e autónomos de Ferrol volvéronse a manifestar polas rúas desta cidade para demandar "un rescate" polo peche imposto "sen ningún tipo de alternativa" mentres pagan "o 100% dos impostos e sen beneficios". Pola súa banda, os de Lugo estudan a presentación dun recurso contencioso ante o Tribunal Superior de Xustiza de Galicia (TSXG), ante a resolución no País Vasco que permitiu a reapertura destes establecementos.

Un dos portavoces de Hostaleiros e Autónomos Ferrolterra (H.A.F), Serxio Perille, destacou, á saída desta nova mobilización, que xa se vai a cumprir un ano con restricións. "Andan xogando connosco dun día para outro sen ningún tipo de alternativa", queixouse, ao mesmo tempo que incidiu en que "todo iso, a pesar do que din os políticos, sen ningún tipo de ingreso e pagando todos os impostos", o que o levou a asegurar que "isto é insustentable".

Antes de iniciar a marcha, participantes entregaron alimentos non perecedoiros que posteriormente foron doados á cociña económica de Ferrol, institución da que os autónomos e hostaleiro encomiaron o seu traballo.

A preguntas dos medios de comunicación, sobre se estiman que deberían de acudir á xustiza para reabrir os seus negocios, Perille afirmou ser consciente de que "é unha posibilidade que desde algunhas asociacións barallan", aínda que desde o seu punto de vista "os políticos son os que teñen que dar unha solución".

Outra das integrantes deste colectivo, Azucena Rico, estimou que "un 40% de negocios pechou" e augurou que "con estas medidas é evidente que serán moitos máis canto máis tempo pase". Rico, que é copropietaria dun negocio de lecer nocturno, manifestou que "as axudas non chegan, os políticos véndenas, pero o 70% das axudas que están pagas son das que aprobaron, pero hai moita xente que non ten acceso a estas achegas polas limitacións que pon".

"Os negocios acabarán pechando e a xente comendo na cociña económica, os que non teñan familia nin maneira de subsistir, porque tras un ano, por moitos aforros que teñas, estes vanse acabando", sentenciou.

Mobilización de hostaleiros e autónomos en Ferrol.