Sanitarios que o Sergas non vacinou: "o martes tivemos que operar un positivo, pero non somos primeira liña"

Nova polémica sobre a vacinación en Galicia. Poucos días despois de que trascendera a inmunización da delegada de DomusVi en Galicia --cualificada por fontes do sector das residencias como "moi amiga" do Presidente--, o foco queda agora posto sobre o avance da campaña sanitaria, moi criticada pola lentitude do seu ritmo. Neste aspecto, a Xunta de Galicia aseguraba o pasado mércores 10 que xa completara a vacinación de todos os sanitarios "de primeira liña" da Comunidade, un fito co que non todos os profesionais da saúde concordan.

Carmen María é enfermeira de quirófano na área sanitaria da Coruña, que nas últimas semanas se vén perfilando como a máis castigada desta terceira vaga. As críticas desta profesional, con todo, non van dirixidas á "irresponsabilidade" denunciada por outras traballadora da área coruñesa, senón contra a "propaganda" da Xunta coa campaña de vacinación.

Esta sanitaria denuncia que, malia ter contacto directo con pacientes covid, nin ela nin as súas compañeiras recibiron aínda a primeira dose da vacina. Carmen María exerce nun quirófano que, aínda o pasado martes 9, tivo que intervir a un positivo confirmado. "Se unha enfermeira de quirófano que fai gardas de urxencia non é de primeira liña... non sei quen o é", valora esta traballadora.

"FALTA DE TRANSPARENCIA"

"Non sabemos a quen consideran de primeira liña"

A denuncia de sanitarios como Carmen María botan sombra sobre o anuncio da Consellería de Sanidade. Dende hai semanas, o ente autonómico vén informando da vacinación deses sanitarios "de primeira liña", pero sen precisar de quen se trata. Unha circunstancia que non senta ben no colectivo sanitario. "O máis tremendo é a falta de transparencia", explica Carmen María, que engade: "non sabemos a quen consideran de primeira liña nin por que a nós nos consideran de segunda".

O escurantismo denunciado por esta traballadora queda reflectido na propia situación do seu quirófano. Alí, explica, o persoal de anestesia xa recibiu a vacina, mentres que o resto de traballadores segue a esperar a primeira dose. A día de hoxe, os traballadores non recibiron explicacións sobre esta diferenza: "os anestesistas e nós traballamos cóbado con cóbado. Por que se lles vacina a eles e a nós non? Non ten sentido", valora.

O inicio da vacinación para os profesionais sanitarios "de segunda liña" abre a porta a que tanto Carmen María como as súas compañeiras reciban a vacina nos próximos días. Atrás quedan, con todo, diversas situacións de contacto directo con positivos covid que parecen máis propias deses profesionais que, para a Xunta, si están ao pé do canón. "A semana pasada tamén tivemos que operar a un caso posible", explica a sanitaria do CHUAC, que subliña o perigo inherente á práctica cirúrxica. "O procedemento médico que máis aeorosois xera é a intubación e a extubación. Iso faise en cada quirófano varias veces ao día", engade.