Por Jessica Fernández | SANTIAGO DE COMPOSTELA | 12/02/2021 | Actualizada ás 09:30
O proxecto 'Despois dun duro adestramento, un camiño cara a inclusión' é unha iniciativa enmarcada no programa 'O teu Xacobeo' da Xunta de Galicia que ten como obxectivo que as persoas con discapacidade intelectual de Galicia poidan prepararse para realizar o Camiño de Santiago dunha forma normalizada e adaptada ás súas capacidades.
Xa a finais de 2019, Special Olympics Galicia puxeron en marcha o proxecto 'Carlota prepara o camiño para o Xacobeo 2021', no que varios grupos de persoas con discapacidade intelectual adestraron durante 2019 e 2020 a través de diferentes rutas do Camiño.
"En Special Olympics Galicia puidemos detectar unha serie de apoios necesarios para o noso colectivo, e comezamos a traballar habilitando as actividades precisas para que as persoas con discapacidade intelectual puideran acceder ás diferentes rutas xacobeas segundo as súas capacidades", defenden dende o colectivo.
Por isto, este ano decidiron levar a cabo esta nova iniciactiva co obxectivo de "ofrecer ferramentas para que todas as persoas con discapacidade intelectual poidan gozar das actividades que ofrece o Camiño de Santiago", reivindican.
Para ese fin, realizarán actividades adaptadas ao colectivo, "dando continuidade aos testeos das rutas e adestramentos dos nosos camiñantes para que estean preparados tanto física como mentalmente para a consecución da Compostela", sosteñen.
INCLUSIVIDADE NOS CENTROS EDUCATIVOS
Do mesmo modo, dende Special Olympics Galicia emprenderán vías de formación e visibilización do Xacobeo inclusivo entre centros educativos e universidades galegas, co fin de achegar a discapacidade intelectual a novas persoas voluntarias "que nos acompañen nesta ambiciosa actividade", inculcando entre a mocidade os valores do Camiño como unha opción de inclusión social e unha contorna accesible para todos e todas.
COLABORACIÓN
A Asociación conta coa participación de preto de 170 persoas con discapacidade intelectual para este proyecto, así como 200 personas de diferentes centros educativos para axudar á difusión dos valores e da riqueza cultural do Camiño de Santiago co fin de "motivalos a acadar o xubileo compostelán", destacan.
"Deste xeito, dende damos continuidade á nosa misión, que vai máis aló de promover a práctica do deporte e a cultura inclusiva, para levar os valores do noso movemento a todos os mozos e mozas da nosa comunidade e conseguir que se impliquen en actividades tan motivadoras como esta, onde Xacobeo e inclusión danse a man para camiñar xuntos", sentencian dende Special Olympics Galicia .
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.