Os prezos soben un 0,4% en Galicia en xaneiro a pesar da virulencia da crise da covid

A inflación rexistrou unha taxa positiva en xaneiro tamén en Galicia, cun incremento anual do 0,4%, despois de 10 meses de caídas, desde marzo de 2020, cando estalou a crise da covid.

Segundo os datos que publica este venres o Instituto Nacional de Estatística (INE), os prezos baixaron un 0,3% en variación mensual, pero a taxa anual pasou do -0,4% de decembro ao 0,4% de comezo de 2021.

O aumento interanual na comunidade galega correspóndese fundamentalmente co do prezo da vivenda (+2,5%), alimentos e bebidas non alcohólicas (+2%), ensino (+1,4%) e hoteis, cafés e restaurantes (+1,3%). Mentres, mensualmente, houbo ascensos en vivenda (+4,6) e transporte (+1,5%), entre outros, pero contrastaron co descenso de vestido e calzado (-15,9%).

DATOS ESTATAIS

No conxunto estatal, o IPC non experimentou cambios en xaneiro respecto ao mes anterior, pero subiu un punto en taxa interanual, ata o 0,5%, rexistrando así a súa primeira taxa positiva tras nove meses en valores negativos.

Esta taxa do 0,5% é unha décima inferior á avanzada a finais do mes pasado, cando o INE situou a taxa interanual de xaneiro no 0,6%. Neste repunte dos prezos influíu, principalmente, a subida dos prezos da electricidade e do gas, e dalgúns alimentos como os legumes e hortalizas, e a auga mineral, os refrescos e os zumes.