O PSdeG asegura que "detrás do caso Bárcenas" tamén está "a corrupción do PPdeG"
Lembra que "os documentos incorporados na causa refiren pagos en B en sedes do PP de Valencia, Madrid e Galicia".
Por E.P. | Santiago de Compostela | 12/02/2021 | Actualizada ás 14:40
O vicesecretario xeral do PSdeG, Pablo Arangüena, asegurou este venres que "detrás do caso Bárcenas" está "a corrupción do Partido Popular, na que se inclúe o PPdeG". Arangüena criticou que o presidente da Xunta e líder do PPdeG, Alberto Núñez Feijóo, asegurase que "detrás" deste caso estaba o Partido Socialista.
"Temos que dicirlle que detrás do caso Bárcenas está a corrupción do seu partido, incluíndo Galicia, porque os documentos incorporados na causa refiren pagos en B en sedes do PP de Valencia, Madrid e Galicia", manifestou.
Ademais, sostivo que o que fora secretario de organización do PP de Galicia, Pablo Crespo, "declarou que o PP de Galicia participaba no financiamento ilegal" e que "se repartían sobres" nunha etapa na que Feijóo xa "era membro da Xunta de Galicia".
Por iso, emprazou a Feijóo a "deixar de facer declaracións relativizando a corrupción do seu partido". "Nun momento de crise como o que vivimos, necesitamos máis ética pública que nunca", sostivo Arangüena.
