Por Europa Press / Redacción | Ourense | 12/02/2021 | Actualizada ás 20:32
Pachi Vázquez, o que fora líder do PSdeG en Galicia, trasladou, despois de transcender que Fiscalía non recorrerá a sentenza pola que saíu absolto das acusacións de prevaricación, que sente "unha gran satisfacción", á vez que descartou regresar á súa antiga formación. "Nese partido xa non teño oco", dixo.
Vázquez, obrigado a dimitir polas acusacións de prevaricación na súa etapa como alcalde do Carballiño polo PSOE, manifestou que o feito de Fiscalía non recorra a súa sentenza absolutoria supón "unha gran satisfacción" que, sobre todo, demostra "que era unha acusación completamente infundada".
Aseverou que a sentenza exculpatoria era "dificilmente recurrible pola súa rotundidade" pero, afirma que a Xustiza "chegou tarde" e que, por iso, o único que solicita é que a situación non se repita "con outro candidato con aspiracións políticas lícitas".
"Que denunciase outra Fiscalía, de oficio, practicamente 10 anos despois de deixar de ser alcalde era cando mínimo raro. Para min non cabe dúbida de que foi porque, naquel momento, ademais de ser alcalde era secretario xeral dos socialistas e o demais se sobreentinde. Considero que o fiscal non actuou correctamente", censurou o creador de Espazo Común.
Así mesmo, opinou que os artífices da denuncia conseguiron o seu obxectivo: "Facer dano ao Partido Socialista e sacarme da circulación, pero sete anos despois sigo en pé".
Neste sentido, reclamou que se reflexione sobre "como sucedeu isto, como se induciu, quen o promoveu, quen o provocou e que perseguían".
"DESCANSO POLÍTICO"
Por todo iso, negou a probabilidade dun regreso ao Partido Socialista asegurando que actualmente se atopa nun "descanso político" no que o seu labor é "acompañar aos seus compañeiros" e sentenciou que o PSOE "agora aplaude e felicita a decisión da sentencia pero no momento deu as costas aos seus representantes".
"Botaron ao portavoz da Deputación e a moitos outros compañeiros por dicir que confiaban en min e na miña inocencia", aseverou, para apostilar "nese partido socialista xa non teño oco", aínda que apelando a que segue sendo socialista. "Só que non dun partido que non confiou no seu secretario xeral e expulsou a todos os que si creron. Iso de socialista ten pouco", opinou.
"RESTITUÍR A CONFIANZA" EN OROZCO E BESTEIRO
Do mesmo xeito que a causa sobre prevaricación foi arquivada tamén se arquivou o 'Caso Garañón' no que estaban acusados o ex secretario xeral dos socialistas galegos, José Ramón Gómez Besteiro, e o que fora alcalde da capital lucense, José López Orozco.
Sobre esta situación pronunciouse Pachi Vázquez aseverando que "o de Besteiro é tremendo, pero o de Orozco todo un clamor, un escándalo". Respecto diso, concluíu que "o que ten que facer" o Partido Socialista é "restituír a confianza" nestas persoas porque "son activos moi importantes do Partido Socialista de Galicia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.