(VÍDEO) "O acoso escolar non é unha cousa de nenos, é un problema social"

O acoso escolar é unha realidade presente no día a día de moitos nenos e nenas, pero tamén de moitos e moitas adolescentes que están buscando a súa propia identidade. As vítimas do chamado 'bullying' sofren os abusos e os ataques dos seus compañeiros ou mesmo de persoas máis maiores coa excusa de ser "diferentes".

Dende as Anpas Galegas defenden que as condutas de acoso escolar non son cousas de nenos, xa que teñen a súa orixe nunha "errónea formación social na que prima a falta de respecto cara os demais, así como unha incorrecta xestión das emocións".

Por isto, denuncian esta situación á que denominan como un "problema social" do que todos formamos parte, xa que como educadores nas escolas, como pais e nais e mesmo como parte da sociedade en xeral, podemos fomentar a correcta educación en valores que permitan o desenvolvemento persoal das próximas xeracións de adultos.

"O ACOSADOR É UN DESGRACIADO"

Pola súa banda, o presidente de Anpas Galegas, Fernando Lacaci reivindica o labor de educar na atención á diversidade, xa que defende que "todos somos diferentes e debemos respectar a todas as persoas sexan como sexan e pensen o que pensen", aludindo de forma aberta á máis profunda liberdade de ser.

Ademais, fai un chamamento a empatizar non só coa vítima que é obxecto de acoso, senón co acosador, ao que denomina como "unha persoa tremendamente desgraciada" que reproduce condutas dos adultos que o están a educar, polo que a culpa é da educación que recibe e non da súa propia natureza.

"OS CENTROS ESCOLARES NECESITAN TEMPO E MEDIOS"

Para combater este problema "social", Fernando Lacaci demanda ás Administracións "tempo e medios" para que o profesorado poida dedicar máis tempo a educar aos seus alumnos e alumnas en valores que potencien o seu desenvolvemento persoal e deixen de estudar "absurdeces todo o día", recalca. 

Como explica Lacaci, os centros escolares deben escoitar aos nenos e nenas e levar a cabo un tratamento exhaustivo dos problemas dos menores así como ter una comunicación constante coas familias co fin de darlles medios cos que poder traballar no ámbito familiar, e conseguir, entre todos, que o acoso escolar deixe de ser un problema todavía recurrente nas aulas galegas.