Por Europa Press / Redacción | SANTIAGO DE COMPOSTELA | 14/02/2021 | Actualizada ás 15:23
O presidente da Confederación de Empresarios de Galicia (CEG), Juan Manuel Vieites, ve a "reindustrialización" como un dos próximos retos a alcanzar en Galicia, mentres sitúa na primavera do 2022 a "clara" recuperación económica tras a crise da covid.
Nunha entrevista concedida no circuíto autonómico de Radio Nacional (RNE), o recentemente elixido líder dos empesarios galegos aseverou que o impacto económico da pandemia é "moi dispar en función dos sectores".
Entre os máis afectados, Vieites mencionou a hostalaría, o comercio, os autónomos, o téxtil e o automóbil, pero asegurou que "isto se vai a solucionar" cando comece a vacinación "masiva". "Eu creo que a partir da primavera do ano 2022 é cando se pode empezar a ver unha situación máis clara na economía", engadiu. Seguidamente, explicou que Galicia "necesita unha reindustrialización", un dos puntos abordados na súa reunión de comezos de febreiro co presidente da Xunta, Alberto Núñez Feijóo.
Neste sentido, o titular da CEG mencionou conflitos como os de Alcoa, a central de Meirama, Siemens Gamesa e Navantia para cifrar nuns 15.000 os empregos que corren perigo. Ante este reto de reindustrializar a Comunidade galega, Vieites asegurou que a colaboración público-privada e os fondos europeos 'Next Generation-EU' poden ser dúas "oportunidades para tentar modificar o sistema produtivo".
"MAIOR DINAMISMO" PARA A CEG
Proviniente de Anfaco-Cecopesca, a patronal das conservas, trata agora de trasladar a dinámica desta organización á CEG: "As empresas pediamos maior dinamismo, maior presenza de comunicación e visualización da voz dos empresarios galegos".
Ademais, tras varios procesos internos errados de elección do presidente da patronal galega, Juan Manuel Vieites reivindícase como candidato de consenso entre aqueles que queren "esquecer un pouco o que pasou nos últimos tempos".
Con 'fichaxes' para a dirección da CEG como Ignacio Rivera, conselleiro delegado de Fillos de Rivera, e Carmen Lence, CEO do grupo Leite Río, o novo presidente busca unha "representatividade adecuada" nun equipo que "poida levar as rendas nestes momentos de recesión económica": "Para sumar e non restar". "A Confederación de Empresarios de Galicia ten que estar aí, defendendo eses intereses e buscar o diálogo cos axentes sociais", recalcou.
DIÁLOGO SOCIAL E REFORMA LABORAL
Precisamente, reivindicou a mesa do diálogo social como o lugar no que se debaten os temas "de máxima importancia" para a competitividade das empresas nun contexto de pandemia. Así, defendeu que foi este diálogo o que conseguiu que o segundo plan de axudas da Xunta á hostalaría, aos autónomos e ao pequeno comercio levase unha "simplificación" das medidas e que os apoios cheguen "o máis rapidamente posible" aos seus destinatarios.
Preguntado pola vontade dos sindicatos de derrogar a reforma laboral de Mariano Rajoy, Vieites respondeu que "non é o momento procesual oportuno". "A reforma laboral que temos, se eliminamos a pandemia, deu os seus froitos adecuados", afirmou. No entanto, mostrouse aberto a "corrixir certas cousas", pero sempre "dentro da mesa do diálogo social" e co obxectivo de ter unha lexislación "que realmente poida crear emprego".
"Hai que ver o impacto, sempre hai que traballar con números. Se hai medidas que poden corrixirse e mellorar, benvidas sexan, pero se estan funcionando ben non se teñen por que tocar ou retocar", abordou. De feito, o novo presidente da CEG lembrou que a Unión Europea recomendou que "quizais nalgún momento habería que flexibilizar un pouco máis as cousas", aínda que "sempre con condicionantes".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.