Por E.P. | Santiago de Compostela | 16/02/2021 | Actualizada ás 16:08
A Xunta de Galicia convocou este martes as axudas para o funcionamento dos grupos de investigación "máis competitivos" do sistema galego de I+D+i para o período 2021-2025, que contarán cun orzamento de 24 millóns de euros.
A liña de axudas, publicada no Diario Oficial de Galicia (DOG), convocouse conxuntamente pola Consellería de Cultura, Educación e Universidade e a Vicepresidencia segunda e Consellería de Ecomomía, Empresa e Innovación.
A convocatoria diríxese ao tres universidades do Sistema Universitario de Galicia (SUG), aos organismos públicos de investigación en Galicia, ás fundacións de investigación sanitaria e aos centros do Consello Superior de Investigacións Científicas (CSIC) e do Instituto Español de Oceanografía (IEO) con sede en Galicia.Do total orzado --24 millóns de euros--, a Consellería de Cultura destina case 20 millóns de euros e a de Economía, a través da Axencia Galega de Innovación - GAIN, catro millóns, o que supón, respectivamente, un 56% e un 82% máis que o achegado en 2020.
Segundo informou o departamento de Educación nun comunicado, o obxectivo destas axudas é "asegurar o financiamento estrutural e continuado, condicionada a criterios de calidade, que garanta o financiamento de base dos grupos científicos máis excelentes do sistema galego de investigación universitaria, de forma que se lles permita desenvolver o seu traballo con estabilidade e cunha liberdade de acción suficiente para reorientalo, de ser o caso".
As axudas divídense en tres modalidades: apoio a Grupos de Referencia Competitiva --modalidade A--, a Grupos de Potencial Crecemento --modalidade B-- e a Proxectos de Persoal Investigador con traxectoria excelente --modalidade C--. Ademais, terase en consideración o liderado de mulleres nas propostas presentadas, "co obxectivo de reducir o desequilibrio entre mulleres e homes dedicados á investigación".
REFORMA DO IES EUSEBIO DA GARDA
Por outra banda, a Xunta investirá máis de dous millóns de euros na rehabilitación integral do instituto plurilingüe Eusebio da Garda, na Coruña, tal e como anunciou este martes o conselleiro de Cultura, Educación e Universidade, Román Rodríguez, na súa visita ao centro educativo.
Rodríguez, que visitou o instituto coruñés acompañado polo delegado da Xunta, Gonzalo Trenor, explicou que o seu departamento "está agora mesmo redactando o proxecto da segunda fase da reforma", co obxectivo de licitar as obras antes do verán e adxudicalas e inicialas durante o último trimestre do ano.
Aínda que o programa non está pechado, o conselleiro adiantou que a segunda fase centrarase na rehabilitación de chans e carpintarías interiores, así como na mellora da accesibilidade e evacuación. Para este fin, os orzamentos autonómicos de 2021 contan cunha partida de 600.000 euros. O primeiro ciclo destas obras, que contou cuns fondos de máis de 1,3 millóns de euros, ocupouse de "mellorar o confort térmico interior e a eficiencia enerxética do edificio".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.