A Xunta denuncia que o Fuenlabrada incumpriu a obrigación de informar dun brote na súa viaxe á Coruña
O documento asinado por un perito especifica que o protocolo do Ministerio de Sanidade xa establecía naquel momento que un brote era "calquera agrupación de tres ou máis casos con infección activa no que se estableceu un vínculo epidemiolóxico".
Por E.P. | A CORUÑA | 18/02/2021 | Actualizada ás 16:44
A Xunta denunciou que o Club de Fútbol Fuenlabrada "incumpriu gravemente a súa obrigación de declarar urxentemente un brote de catro casos de Covid-19" e, por tanto, saltouse "os protocolos sanitarios" ao trasladarse á cidade herculina a xogar un partido contra o Deportivo da Coruña en xullo do ano pasado.
Segundo o informe encargado polo Goberno galego para achegar á causa xudicial, os servizos médicos do club de fútbol non actuaron correctamente posto que o coronavirus xa era unha enfermidade "de declaración obrigatoria urxente", polo que os primeiros positivos tiñan que ser comunicados a Saúde Pública da Comunidade de Madrid.
O documento asinado por un perito especifica que o protocolo do Ministerio de Sanidade xa establecía naquel momento que un brote era "calquera agrupación de tres ou máis casos con infección activa no que se estableceu un vínculo epidemiolóxico", co que critica que tanto a liga como o Fuenlabrada non o considerasen como tal e non o fixesen público.
Aínda que os xogadores que se trasladaron ata a cidade tivesen, engade o informe pericial, "unha PCR negativa do día anterior" non exime, argumenta, "á liga e ao Fuenlabrada da grave neglixencia de realizar a viaxe". Como sucedeu, apostila o texto, os membros do club "eran contactos de positivos e podían estar a desenvolver a infección".
