Cedeira dálle gratis un albergue a Organización Juvenil Española
Cédenlle a xestión por 10 anos para que esta entidade, que naceu dentro das estruturas do Franquismo, "aproveite" as instalacións poñendo o prezo que estime oportuno. O rexedor chegou ao cargo en 1973 e no 1977 tivo que lidiar cunha forte polémica por inaugurar unha estatua en homenaxe a Franco.
Por Galicia Confidencial | Cedeira | 12/08/2013 | Actualizada ás 08:00
Leopoldo Rubido Ramonde, o alcalde popular de Cedeira, acaba de concederlle por cero euros a xestión e explotación económica do albergue municipal "Os pinos" á Organización Juvenil Española (OJE), unha entidade creada no Franquismo e amparada pola Falange.
Segundo o prego de condicións aprobado polo concello, o obxecto da concesión é a utilización e aproveitamento dos citados bens para actividades culturais-deportivas e educación medio ambiental. O prazo da concesión será de 10 anos dende a sinatura do contrato administrativo e os únicos cartos que teñen que poñer desde esta asociación son 6.656,91 euros en concepto de fianza que serán devoltos unha vez rematada a concesión.
Establecerá as tarifas
Segundo os pregos aprobados, OJE "obstentará as facultades inherentes ao obxecto da presente concesión", e conservará adecuadamente as instalacións, reparando e repoñendo cando fose nencesario polo seu deterioro, así como manter informado ao Concello das actividades que leve a cabo. Isto inclúe, que poida explotar económicamente este edificio "mediante as tarifas que o concesionario estableza e que deberá comunicar ao Concello".
Os únicos gastos para OJE serán aqueles derivados dos subministros de auga, luz, lixo e IBI e demáis gastos e tributos que se deriven da concesión administrativa, debendo suscribir unha póliza de seguro que cubra o propio inmoble e as actividades programadas pola mesma. O único que gaña o concello con esta cesión voluntaria son "todas as melloras producidas ao remate do prazo da concesión administrativa".
Esta concesión administrativa inclúe o inmoble e fincas anexas e foi aprobada por que "concorren circunstancias excepcionais debidamente acreditadas na documentación" --das que o concello non dá conta--, para a súa aprobación. A decisión foi adoptada co voto favorable dos sete edís populares e a negativa dos dous do PSdeG e dous do BNG.
A OJE, nacida no Franquismo
A OJE é unha organización que naceu en pleno Franquismo, nos anos 60, como unha dependencia da Delegación Nacional da Fronte de Mocidades e, polo tanto, da Secretaría Xeral do Movemento, e cando o Réxime iniciaba un lavado de imaxe en Europa. Non é ata 1978 cando esta organización se puxo ao día no legal e declarouse "Organización nacional democrática apolítica". En 1981 foi declarada Entidade de Utilidade Pública e con ese recoñecemento mantense nos nosos días.
Na actualidade a OJE céntrase na educación non formal dos nenos, novos e adolescentes, para o que conta co seu propio sistema formativo. A OJE é membro fundador do Consello da Mocidade de España. O seu lema é "Vale Quen Serve", o seu emblema é unha cruz en cuxo centro figura, en ouro, un león rampante coroado e o seu patrón é Fernando III o Santo, Rei de León e Castela.
Un alcalde da época Franquista
Esta concesión foi rubicada por Leopoldo Rubido Ramonde --irmán do director do xornal conservador ABC, Bieito Rubido--, quen asumiu a alcaldía de Cedeira en 1973, cando o réxime franquista aínda gobernaba España, e ostentou o bastón de mando durante trinta anos. Tivo que deixar a alcaldía no 2007, pero volveu a gañar por maioría absoluta nas pasadas eleccións municipalis.
En 1977 tivo que sortear unha gran polémica cando decidiu construír un monólito na honra de Franco. A decisión tivo unha forte contestación de parte dos veciños, pero finalmente foi inaugurado o 14 de maio por Gonzalo Fernández de la Mora.
