Baixa a presión hospitalaria pola covid en Galicia, menos en Pontevedra-O Salnés
Nestas comarcas a taxa de postividade do virus é máis do triple do recomendado pola OMS, mentres que a media galega está por baixo do 5%.
Por Europa Press / Redacción | Pontevedra | 19/02/2021 | Actualizada ás 11:47
A presión hospitalaria que deixa a pandemia da covid-19 en Galicia continúa cunha curva descendente cun total de 813 ingresados, 50 menos que os que había 24 horas atrás. Destes, hai 169 nas unidades de coidados intensivos (UCI), o que implica unha baixada de 11.
Mentres tanto, os casos de coronavirus detectados en Galicia ascenderon a 110.031 desde o inicio da pandemia, dos que 352 sumáronse no último día --325 confirmados cunha PCR--. Esta cifra significa unha estabilización nas novas infeccións rexistradas, xa que son só unha máis que a xornada previa e a metade que a de hai unha semana.
No que respecta á presión hospitalaria, con datos actualizados pola Consellería de Sanidade ás 18,00 horas do xoves, a única área sanitaria na que aumenta é Pontevedra-O Salnés, ao sumar un paciente novo en UCI, que soben ata os 16, e o total de ingresados colócase en 94.
En canto ao resto de áreas, seguen á baixa. A da Coruña-Cee continúa como a de maior número de pacientes covid, con 247 ingresados en total --dous menos que 24 horas atrás--, dos que 59 están en coidados intensivos --catro menos--.
Tamén descenden os hospitalizados na de Ferrol, con 114 enfermos de covid (-3), 16 deles en UCI (-3); e na de Santiago-Barbanza, con 119 pacientes de coronavirus (-10), dos que están en críticos 24 (-1).
Na área sanitaria de Vigo, os ingresados caen nunha vintena, ata os 91 en total, e en críticos son 20, tres menos que un día atrás. Na de Ourense-Verín-O Barco descenden en oito, ata os 96, aínda que os que están críticos mantéñense en 13; mentres que en Lugo-A Mariña-Monforte os ingresados colócanse en 62 --nove menos--, dos que 21 están en coidados intensivos --un menos--.
CONTAXIOS E PCR
Pola súa banda, os novos casos detectados a diario na Comunidade galega por todo tipo de probas subiron en 352 nun día, só un máis que a xornada inmediatamente anterior. A área sanitaria da Coruña-Cee suma 87 novos casos de covid. Séguelle a de Vigo, con 77; Pontevedra-O Salnés, con 59; Santiago-Barbanza, con 38; Ferrol e Lugo-A Mariña-Monforte, con 34 cada unha; e Ourense-Verín-O Barco, con 23 positivos detectados en 24 horas.
De todos os novos contaxios que detectou Galicia, 325 foron confirmados cunha PCR. Precisamente, Sanidade realizou no último día 7.288 probas deste tipo, unhas 800 menos que o día anterior, e desde o inicio da pandemia sitúanse nas 1.608.098 en total.
Así, a taxa de positividade aumentou medio punto na Comunidade, ata o 4%, pero aínda está por baixo do 5% que marca a Organización Mundial da Saúde (OMS) para dar por controlada a pandemia. Por áreas sanitarias, cabe destacar a subida ata o 14% en Pontevedra, mentres na Coruña está no 6,7% e en Ferrol no 6,2%. O resto, están por baixo do limiar do 5%: Vigo (4,8%), Lugo (3,1%), Ourense (1,8%) e Santiago (1,3%).
MENOS CASOS ACTIVOS
Ademais, os casos activos manteñen a tendencia descendente e caen a 10.040, o que supón unha caída de 868 nun día. De feito, a baixada é sostida no sete áreas sanitarias galegas. En concreto, na Coruña-Cee diminuíron en 206, ata situarse en 3.262 pacientes covid en total. Tamén baixaron en Vigo, ata os 1.452 casos activos (-169); en Pontevedra-O Salnés, a 1.328 (-119); e en Santiago-Barbanza, a 1.150 (-201).
O tres restantes están xa por baixo do milleiro de enfermos por coronavirus: Ferrol, 993 casos activos (-73); Lugo-A Mariña-Monforte, con 942 (-78); e Ourense-Verín-O Barco, con 843 (-92).
