O BNG propón investir 100 millóns dos fondos europeos para un centro de almacenaxe enerxético nas Pontes

A portavoz nacional do BNG, Ana Pontón, detallou que o proxecto global que presenta o BNG "non busca asentarse nas vellas bases, senón que o que busca é novas alternativas e enfrontarse a novos retos".

Por E.P. | SANTIAGO DE COMPOSTELA | 19/02/2021 | Actualizada ás 18:20

Comparte esta noticia

A portavoz nacional do BNG, Ana Pontón, presentou este venres en Ferrol o proxecto 'Xerar Futuro Galiza Next', que contempla un investimento de 14.380 millóns de euros dos fondos europeos Next Generation durante o próximos dez anos para "cambiar o modelo enerxético e produtivo".

Entre estas propostas, Ana Ponton situou a creación dun "Centro para a competitividade e o I+D+i e o almacenamento de enerxía", cuxo emprazamento estaría nas Pontes de García Rodríguez e que contaría "cun investimento de 100 millóns de euros". "A capacidade para almacenar enerxía é unha cuestión clave para o futuro, para abordar as descarbonización e unha transición enerxética xusta", explicou.

Pontón detallou que o proxecto global que presenta o BNG "non busca asentarse nas vellas bases, senón que o que busca é novas alternativas e enfrontarse a novos retos, cunha transición enerxética xusta, a reindustrialización, o reforzo dos servizos públicos e de aproveitar este momento de crise para cambiar de modelo", asegurando que han decido presentar esta proposta en Ferrol por ser "unha cidade de longa tradición industrial e un referente no ámbito enerxético".

Outra das propostas de 'Xerar Futuro Galiza Next' é converter á comunidade en "líder en enerxías renovables, cun investimento de 412 millóns de euros" e coa creación dunha empresa pública de enerxía, con 50 millóns de euros, para, desde ela, "dirixir e marcar a estratexia enerxética, para que Galicia poida decidir o seu futuro enerxético". Isto, profundou, sustentaríase "co rescate das concesións hidroeléctricas e facer así unha planificación ao servizo do país e non dun puñado de empresas".

Finalmente, a terceira proposta neste ámbito sería "que se aposte por comunidades locais de enerxía renovables, cun investimento de 212 millóns de euros", algo que pretende "ofrecer beneficios enerxéticos, económicos, ambientais e sociais aos integrantes destas comunidades locais, que estarían formadas polos concellos e actores relevantes económicos e sociais do municipio, como asociacións ou cooperativas".

SECTOR INDUSTRIAL

No ámbito do sector industrial, o BNG propón que, "no prazo dunha década, o sector industrial galego represente o 25% do PIB", cun plan de fomento da actividade tecnolóxica industrial a dez anos cun investimento de 1.250 millóns de euros para "crear valor engadido e emprego de calidade".

No caso de Ferrol, a proposta pasaría pola creación dun centro de reparación naval na ría de Ferrol. "A comarca de Ferrol ten futuro, é necesario o apoio das administracións e eliminar ese veto que non está escrito que existe á construción naval civil nesta ría", resolveu

Por último, desde o BNG tamén inciden en que é necesario "un plan de rexeneración produtiva das rías, cun investimento de 1.096 millóns de euros, e que tamén ten a súa importancia nestes momentos aquí, dada a situación que presenta a ría de Ferrol".

A central termica das Pontes (A Coruña).. EUROPA PRESS - Arquivo
A central termica das Pontes (A Coruña).. EUROPA PRESS - Arquivo

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta