O Sergas comezará este luns a vacinación "masiva" dos maiores de 80 anos

Supoñerá o comezo da campaña para este colectivo de 200.000 persoas, que podería estar inmunizado a comezos de maio. As vacinas serán inoculadas nos hospitais e centros de saúde de todo o territorio agás no caso de persoas con problemas de mobilidade, que poderán recibilas no propio domicilio.

Por Europa Press / Redacción | SANTIAGO DE COMPOSTELA | 21/02/2021 | Actualizada ás 13:17

Comparte esta noticia

O Servizo Galego de Saúde (Sergas) comezará este luns, 22 de febreiro, a vacinar fronte á Covid-19 ao groso das máis de 200.000 persoas maiores de 80 anos en Galicia, considerado un dos grupos prioritarios para recibir as doses, trala proba piloto levada a cabo o pasado venres na área de Santiago e Barbanza.

Segundo confirmaron a Europa Press por parte da Consellería de Sanidade non poden cuantificar a cifra de dose que empregarán no inicio da vacinación deste grupo porque dependerá dos envíos comprometidos polo Goberno central. Ademais, aínda que as mesmas fontes de Sanidade destacaron que se comezou co chamamento destas persoas, aínda traballan na elaboración de listas. "Se non hai imprevistos cos envíos (de vacinas)", engadiron, este proceso, que levará a cabo só con dose de Pfizer, en maiores de 80 anos estenderase ata "a primeira semana de maio".

Aínda que o groso da vacinación deste grupo comezará o luns, o venres 19 de febreiro levouse a cabo unha proba piloto a modo de ensaio. En concreto, oito equipos especiais de vacinación da área sanitaria de Santiago e Barbanza comezaron a pór as primeiras doses a persoas deste grupo en oito centros nos que foron citados 569 maiores de 80 anos, que en tres semanas recibirán a segunda.

PUNTOS DE VACINACIÓN

Por parte da Consellería de Sanidade explicouse que para a vacinación dos maiores de 80 anos os puntos de vacinación, debido ás condicións de transporte e conservación das doses, será levada a cabo nos centros de saúde das sete grandes cidades galegas e nos centros de cabeceira ou Puntos de Atención Continuada (PAC) fose delas.

Deste xeito, a Xunta prevé que este proceso de vacinación de maiores de 80 anos leve a cabo en 400 puntos. Ademais, o presidente da Xunta, Alberto Núñez Feijóo, avanzou tras o comité clínico do pasado 15 de febreiro, que no caso de que "por razóns de mobilidade" non poidan desprazarse, acudirán "ao domicilio de cada un deles".

Vacinación nunha residencia. JOSE ROMAN CAVIA SOTO
Vacinación nunha residencia. JOSE ROMAN CAVIA SOTO

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta