O segundo plan de rescate da Xunta aplicará 5 millóns para autónomos que rexistren caídas de máis do 70%
O plan tamén establece unha "axuda complementaria" en función do número de traballadores, posto que un dos obxectivos fundamentais é o mantemento do emprego.
- A Xunta atrasa as axudas de 15 millóns a hostalaría pola "avalancha" de peticións
- A Xunta di que hostaleiros e autónomos poderán solicitar de inmediato as axudas do segundo plan de rescate
Por Europa Press / Redacción | SANTIAGO DE COMPOSTELA | 22/02/2021 | Actualizada ás 14:31
O segundo plan de rescate da Xunta fronte á crise da covid reserva 5 millóns dun total de 30 da liña específica para autónomos a aqueles que acrediten un descenso na súa facturación de máis do 70%, "os máis afectados" pola pandemia.
Do total de 75 millóns deste segundo plan de rescate (15 deles pendentes dunha orde que prevé publicar este martes o Diario Oficial de Galicia), 30 destínanse ao colectivo de autónomos, que á súa vez se divide en dúas partidas: unha con 25 millóns e outra con 5 para os autónomos "que o están pasando peor".
O plan tamén establece unha "axuda complementaria" en función do número de traballadores, posto que un dos obxectivos fundamentais é o mantemento do emprego. A Asociación de Autónomos e Pequenas Empresas de Galicia celebrou este luns unha reunión telemática sobre o segundo plan de rescate da Xunta, coa intervención do subdirector xeral de Emprego, Juan Lirón.
Tamén participou a secretaria xeral de Emprego, Covadonga Toca, quen reivindicou a vontade da administración autonómica de "acompañar" aos autónomos, "peza crave de maneira especial en Galicia". Coa intención de "chegar aos que están en peores condiciones pero a actividades que van seguir desenvolvéndose", explicou que estas axudas están "baseadas no descenso de facturación", polo que avogou por que "antes de solicitar a axuda hai que reflexionar sobre como vou acreditalo".
Precisamente respecto diso, a conselleira de Emprego, María Jesús Lorenzana, avisou nunha entrevista con Europa Press de que a Xunta fará as correspondentes comprobacións e, en caso de non observarse os requisitos, "terá que haber un reintegro das axudas". O departamento autonómico chama a atención sobre que todas as liñas deste plan de rescate son compatibles, en caso de cumprirse as condicións.
OURENSE E A CORUÑA
Na mesma liña de dar a coñecer as axudas celebráronse este luns outras reunións e, así, o delegado territorial da Xunta en Ourense, Gabriel Alén, desenvolveu unha xornada informativa de forma telemática para o sector da hostalaría e outras actividades pechadas polas medidas sanitarias, como ximnasios, parques infantís e feirantes.
Na Coruña, o delegado territorial nesta provincia, Gonzalo Trenor, mantivo un encontro cos representantes da Asociación de Hostaleiros de Ferrol e Comarca para informar de que a orde cos 15 millóns restantes que completan o plan --dirixidos en concreto a hostalaría-- publicarase este martes.
