Máis de 170.000 galegos recibiron polo menos unha dose de vacina contra a covid-19

Máis de 170.000 galegos xa recibiron, polo menos, unha dose de vacina contra a covid-19 e 58.052 xa están inmunizados coa pauta completa. Segundo os datos do Ministerio de Sanidade, Galicia puxo nas últimas 24 horas máis de 7.400 novas doses, o 91,2% das 186.985 recibidas, unha porcentaxe superior á media estatal, do 87,4%.

Estes datos tamén foron mencionados este martes polo conselleiro de Sanidade, Julio García Comesaña, durante a súa participación no Pleno do Parlamento, onde ratificou que, a expensas de que chegue un novo envío, Galicia recibiu 153.385 doses de Pfizer, 9.800 de Moderna e 23.800 de AstraZeneca.

Entre os vacinados están 19.573 usuarios de residencias que xa teñen a pauta completa e 1.129 que recibiron unha dose; así como 19.063 traballadores do ámbito sanitario con dúas dose e 44.025 cunha. Unhas 5.000 persoas do ámbito sociosanitario xa teñen tamén unha dose.

Esta semana, lembrou Comesaña, iniciouse a vacinación dos maiores de 80 anos. "Avanzamos ao ritmo que nos permiten as doses recibidas", garantiu.

Ademais, xa a pasada semana comezouse a inmunizar a persoal sanitario de hospitais privados, empresas, médicos privados, empresas contratadas polo Sergas ou grupos de investigación, así como alumnado en prácticas.

O conselleiro explicou que se seguirá avanzando na vacinación tamén de persoal de Axuda no Fogar, centros de día, psiquiátricos, representantes sindicais e, a partir deste mércores de forma completa, profesorado, un colectivo que espera ter vacinado a finais de marzo.

Do mesmo xeito, Sanidade traballa coa Fegamp e co Goberno central na recompilación de datos do persoal de seguridade e emerxencias dependeinte das administracións locais e das Forzas e Corpos de Seguridade do Estado, que se inmunizarán a continuación.

DEPENDENTES E ÓPTICOS

O Defensor do Paciente asegura que grandes dependentes e os seus familiares "non están a ser vacinados" fronte á covid e advirte de que "non deben ser os últimos da fila". Pola súa banda, o colexio de ópticos-optometristas denuncia a súa "exclusión" do plan para profesionais sanitarios en Galicia

En concreto, o Defensor do Paciente diríxese ao presidente da Xunta e ao conselleiro de Sanidade para trasladarlle un caso concreto ante o que considera "unha violación dos dereitos de familiares e pacientes con gran dependencia". "Están indefensos encerrados e tamén teñen o desprezo administrativo ao non vacinalos a eles e ás súas familias", afirma esta asociación.

Respecto diso, agrega que "a constitución non ten preferencias nos dereitos" e "pola contra deben ser tratados con prioridade, como pasou nas residencias". "Esperamos responsabilidade, respecto e acción sen escusas porque non as hai", incide.

Pola súa banda, o Colexio de Ópticos-Optometristas de Galicia manifesta o seu "estupor ante a decisión da Consellería de Sanidade da Xunta de Galicia de excluír aos ópticos-optometristas do plan de vacinación para profesionais sanitarios, é dicir, do Grupo 3B de vacinación contra a covid-19".