O PP defende a "transparencia" de Sanidade no plan de vacinación e nas camas UCI
O BNG pide unha folla de ruta "exhaustiva" para próximas fases de vacinación e o PSdeG información sobre camas UCI "fisicamente existentes".
Por Europa Press / Redacción | SANTIAGO DE COMPOSTELA | 23/02/2021 | Actualizada ás 21:28
O PPdeG, grupo maioritario do Parlamento galego, defendeu este martes no pleno o plan de vacinación elaborado e actualizado polo Servizo Galego de Saúde (Sergas) para xustificar o seu voto en contra dunha iniciativa do BNG que pedía unha folla de ruta "exhaustiva" para as próximas fases.
En concreto, tratábase dunha moción defendida pola nacionalista Iria Carreira na que se solicitaba ademais un "reforzo" do persoal dedicado a este labor, sen "menoscabo" doutros servizos, e do sistema de rastrexo e de probas masivas para a detección de casos de coronavirus. A moción do BNG topouse co 'non' do PPdeG, cuxa deputada Marta Rodríguez-Vispo defendeu que a Xunta "xa conta cun plan" a disposición da cidadanía na web do Sergas.
MOCIÓN SOBRE UCI
En materia sanitaria, o PPdeG tamén tombou unha moción dos socialistas, defendida por Julio Torrado, para que o Sergas faga público nos datos diarios da pandemia en Galicia cantas camas UCI hai "fisicamente existentes", cantas están ocupadas por pacientes covid e cantas están libres. Iso permitiría, afirmou o deputado, coñecer "o nivel real de presión asistencial" do sistema como unha maneira "bastante útil" de concienciar á poboación.
Fronte a iso, a popular Encarnación Amigo defendeu a "transparencia" dos datos que xa ofrece a Xunta, á vez que apoiou que, como camas para pacientes críticos, tamén se poden utilizar as doutras unidades --como quirófanos e salas de reanimación-- que están "perfectamente equipadas".
