As candidaturas ao I Recoñecemento Acampa á Defensa de Dereitos Humanos rematan o domingo

Este domingo finaliza o prazo para a presentación de candidaturas ao I Recoñecemento Internacional Acampa á Defensa dos Dereitos Humanos, segundo informan os seus promotores.

A Rede Acampa pola Paz e o Dereito a Refuxio pon en marcha esta distinción coa que busca "pór en valor aquelas entidades ou persoas referentes que destaquen na defensa dos dereitos humanos, especialmente naqueles campos nos que traballa o movemento Acampa: dereitos humanos, dereito a refuxio e defensa da paz e o diálogo como fórmula para a resolución de conflitos".

"Non é un premio nin un galardón senón o noso recoñecemento e a difusión pública do seu exemplo social", asegura o coordinador da Rede Acampa, Xosé Abad.

Por iso, animan a todos os colectivos e particulares comprometidos con esta iniciativa a presentar candidaturas "que permitan recoñecer e agradecer publicamente a aqueles que seguen crendo que a defensa dos dereitos humanos é un elemento irrenunciable e innegociable".

Tanto as candidaturas como a elección das mesmas, tanto locais como a de carácter internacional, serán propostas e votadas polas organizacións e persoas que conforman a Rede Acampa Internacional. As persoas interesadas poden consultar as bases na web desta rede.

Recoñecemento Internacional de Acampa á Defensa dos Dereitos Humanos. REDE ACAMPA | Fonte: Europa Press