Galicia pasou xa a terceira onda da covid: baixan os hospitalizados e os novos contaxios
A taxa de positividade cae a un 3,3% e os novos contaxios soben a 279 na Comunidade galega
Por Europa Press / Redacción | SANTIAGO DE COMPOSTELA | 24/02/2021 | Actualizada ás 11:06
A presión hospitalaria mantén a tendencia descendente en Galicia con 59 ingresados menos con Covid-19 con respecto á xornada anterior ao situarse con 634 pacientes con coronavirus. Tamén volveron a reducirse os casos activos, que supoñen 7.292. Así se reflicte nos datos actualizados este mércores pola mañá pola Consellería de Sanidade con rexistros ata as 18,00 horas deste martes, que inclúen 133 pacientes con Covid en UCI --13 menos-- e 501 noutras unidades --46 menos--.
Os ingresados con coronavirus baixan en seis do sete áreas sanitarias, xa que soben lixeiramente na de Santiago e Barbanza, onde hai 18 en UCI --un menos-- e 70 noutras unidades --cinco máis--.
Con todo, o maior alivio corresponde á área da Coruña e Cee, onde caen a 42 as persoas con Covid en UCI --seis menos-- e a 143 os ingresados noutras unidades --25 menos--; mentres que na de Vigo descenden a 21 --dúas menos-- e 55 --seis menos--, respectivamente.
Na área de Lugo baixan a 16 as persoas en críticos con coronavirus --tres menos-- e a 37 as que permanecen noutras unidades --seis menos--; na de Pontevedra e O Salnés mantéñense en 17 os hospitalizados en UCI e descenden a 55 os doutras unidades --sete menos--.
Tamén se reducen nun as persoas con Covid en UCI en Ferrol ata as 11 e caen a 85 os hospitalizados noutras unidades --catro menos--, mentres que na de Ourense mantéñense en oito os pacientes en críticos e baixan a 56 os que permanecen noutras unidades --tres menos--.
MENOS CASOS ACTIVOS E MÁIS CONTAXIOS
Os casos activos manteñen, así mesmo, a tendencia descendente e sitúanse en 7.292 en Galicia, o que supón 456 menos que a xornada anterior. Xa están por baixo do milleiro en cinco das sete áreas: 983 na de Pontevedra e O Salnés; 807 na de Santiago e Barbanza; 767 na de Ferrol; 748 na de Lugo e 509 na de Ourense. Por contra, seguen por encima do milleiro de casos activos de Covid-19 a área sanitaria de Vigo, con 1.127; e a da Coruña e Cee, que conta con 2.351.
En canto aos novos contaxios diarios detectados por calquera tipo de proba, aumentaron lixeiramente a 279 en Galicia, dos que 223 son positivos confirmados por PCR nas últimas 24 horas. Destes últimos, 58 corresponden á área da Coruña e Cee; 48 á de Vigo; 38 á de Santiago e Barbanza; 28 á de Pontevedra e O Salnés; 25 á de Lugo; 16 á de Ferrol e 10 á de Ourense.
Ata a data realizáronse en Galicia 1.641.875 probas PCR, o que supón 6.473 máis que as contabilizadas ata a xornada anterior na Comunidade galega.
TAXA DE POSITIVIDADE E FALECIDOS
Pola súa banda, a taxa de positividade --porcentaxe de infeccións por test PCR realizados-- reduciuse a un 3,3 por cento tras aumentar ao 4,8% a xornada anterior, polo que segue por baixo do 5% que a Organización Mundial da Saúde (OMS) marca como máximo para dar por controlada a pandemia.
