Por fin os usuarios de residencias de maiores poderán saír a pasear

O presidente da Xunta, Alberto Núñez Feijóo, anunciou que os usuarios inmunizados fronte á covid-19 dos centros xeriátricos galegos retomarán as saídas desde este fin de semana, á vez que fixo un chamamento a actuar "co maior exercicio de responsabilidade individual e colectiva" no marco da desescalada que se inicia na Comunidade este venres.

Ás portas da reapertura da mobilidade en boa parte do territorio galego e da hostalaría, entre outras medidas, o presidente advertiu que hai "preocupación" en relación a que a desescalada se faga "con responsabilidade" e lanzou un aviso: "Se non o facemos ben, volveremos cara atrás e a restricións lamentables" que afectan tamén á "saúde económica" galega.

Así mesmo, anunciou que "desde este fin de semana" os maiores que estean inmunizados fronte á covid-19 --é dicir, quen recibisen a segunda dose da vacina fai máis de dez días-- poderán volver saír dos centros xeriátrico. En total serán 20.000 usuarios que poderán saír acompañados por familiares dúas veces por semana cunha duración de dúas horas.

Neves Cabo Vidal, unha muller de 82 anos residente do centro de maiores Porta do Camiño de Santiago, aplaude tras converterse na primeira persoa en recibir a vacina contra a Covid-19 en Galicia, en Santiago de Compostela. Álvaro Ballesteros - Europa Press