Feijóo di que o Goberno foi "neglixente" nas manifestacións do 8M do 2020 e pide evitar que se repita este ano
Esixe que "exerza as súas competencias" e exemplifica con que na protesta de negacionistas había xente sen máscara e de fóra de Galicia.
Por Europa Press / Redacción | SANTIAGO DE COMPOSTELA | 25/02/2021 | Actualizada ás 18:20
O presidente da Xunta, Alberto Núñez Feijóo, advertiu este xoves que España segue estando nunha situación de risco "non menor" pola covid-19 e as novas cepas, polo que apelou á "prudencia" e incidiu en que o Goberno debe "exercer as súas competencias" e non ser "activista" de manifestacións que poidan supor un perigo para a saúde pública.
Tras o Consello da Xunta, preguntado polo 8M e as manifestacións autorizadas en Madrid, Feijóo replicou que no actual contexto, con España en estado de alarma e con toque de queda decretado, "calquera chamada á prudencia é sempre escasa" e toda chamada á precaución resulta "imprescindible".
"É evidente que o Goberno o 8 de marzo de 2020 actuou como mínimo de forma neglixente e espero que neste 2021 as neglixencias formen parte do pasado", dixo o presidente, para engadir que "o importante en calquera tipo de manifestación é que se cumpran os criterios sanitarios vixentes en cada comunidade".
"E o desexable é que o Goberno non sexa o actor principal que active manifestacións e concentracións", apostilou, para engadir que en plena pandemia, con estado de alarma e toque de queda "non parece moi razoable que os gobernos promovan manifestacións e concentracións".
CRITICAS POLA PROTESTA DE NEGACIONISTAS EN GALICIA
Tamén insistiu en pedir "prudencia extrema" e que o Goberno non sexa "activista" de manifestacións que poidan entrañar riscos para a saúde, pero tamén advertiu, nunha velada crítica á Delegación do Goberno na Comunidade, que o Executivo debe "exercer as súas competencias".
E é que, a continuación, lembrou que o pasado fin de semana en Santiago produciuse unha manifestación de negacionistas e contra a lei de saúde "autorizada" pola Delegación e na que participou xente "que non levaba a máscara posta" e procedía de fóra da Comunidade, a pesar de ser Galicia "un territorio pechado". "Volvo pedir ao Goberno que tome nota e non facilite as concentracións de persoas que incumpren as normas de saúde pública", resolveu.
