Por Europa Press / Redacción | Santiago de Compostela | 25/02/2021 | Actualizada ás 18:57
A orde de medidas publicada este xoves no Diario Oficial de Galicia, e que entrará en vigor o venres, establece a reapertura dos establecementos de xogos de azar naqueles concellos cunha incidencia menor aos 250 casos por 100.000 habitantes a 14 días e que se atopan fóra do tres áreas sanitarias con peor ocupación de UCI (A Coruña, Ferrol e Pontevedra).
En concreto, segundo recolle o DOG publicado este xoves, poderán abrir os establecementos de xogos de azar, salóns de xogo, bingos, salóns recreativos, tómbolas e locais de apostas. A súa actividade limítase ás 18,00 horas e deberá garantirse que se cumpren as medidas de distancia e seguridade.
Do mesmo xeito, ademais deste réxime xeral, no caso de que se preste algún servizo de hostalaría ou restauración, o réxime horario e condicións adecuarase ao dos locais hostaleiros. A apertura operará nos 197 concellos con menos de 250 casos por 100.000 habitantes a 14 días das áreas sanitarias de Santiago, Vigo, Lugo e Ourense, non así nos da Coruña, Ferrol e Pontevedra.
Na orde do DOG, a Xunta establece tamén que continuarán abertos os hoteis e aloxamentos turísticos, iso si, para usuarios que se movan con arranxo á normativa vixentes. Non será o mesmo para os albergues, que polo momento permanecen pechados ao público, co que o Camiño de Santiago cumpre os dous primeiros meses do Ano Santo 2021 con este tipo de recursos sen actividade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.