Por Europa Press / Redacción | Santiago de Compostela | 25/02/2021 | Actualizada ás 19:16
Galicia administrou 189.969 dose das 235.025 vacinas recibidas contra o coronavirus, o que supón o 80,8% do total, segundo os datos publicados este xoves polo Ministerio de Sanidade --que se corresponden sempre con cifras da xornada anterior--.
De tal forma, en 24 horas vacináronse en Galicia a máis de 10.800 persoas, unha das maiores cifras desde o comezo deste proceso.
Esta taxa do 80,8% está por enriba da media española, que é do 76,2%. No Estado, inxectáronse 3.436.158 dose das 4.508.845 que chegaron.
As persoas que recibiron en Galicia as dúas doses que inmunizan contra o coronavirus son 58.354 (pouco máis dun cento respecto ao día anterior). En España, esta cantidade ascende ata os 1,2 millóns de persoas.
Galicia recibiu un total de 235.025 doses, despois de que chegasen preto de 50.000 vacinas esta semana --os datos actualízanse cada mércores--. Delas, 153.385 son de Pfizer; 23.800, de Astrazeneca; e 9.800, de Moderna.
Precisamente, nas últimas xornadas comezouse coas inxeccións ao profesorado galego. Por exemplo, na área de Santiago citouse este xoves a medio milleiro de docentes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.